Asnjë tifoz izraelit nuk do të lejohet të marrë pjesë në përballjen mes Aston Villas dhe Maccabi Tel Aviv, e vlefshme për fazën e grupeve të UEFA Europa League, që do të luhet më 6 nëntor në stadiumin “Villa Park”.
Lajmi u konfirmua zyrtarisht nga klubi anglez, duke theksuar se vendimi u mor pas shqetësimeve të ngritura nga autoritetet për sigurinë publike. Ky vendim vjen në sfondin e protestave të fundit të ndodhura gjatë ndeshjeve të përfaqësueses së Izraelit kundër Norvegjisë dhe Italisë, ku policia u detyrua të përdorte gaz lotsjellës ndaj protestuesve pro-palestinezë në qytetet Oslo dhe Udine.
Në një deklaratë për shtyp, Aston Villa tha se ka vepruar sipas udhëzimeve të Grupit Këshillimor të Sigurisë (SAG), organ që lëshon certifikatat e sigurisë për ngjarjet sportive në Villa Park. Policia e ka klasifikuar ndeshjen si “me rrezik të lartë” për shkak të incidenteve të mëparshme, duke përfshirë përplasjet e dhunshme gjatë ndeshjes Ajax–Maccabi Tel Aviv në Amsterdam në vitin 2024.
Përplasjet e ashpra në Amsterdam vitin e kaluar rezultuan në dhjetëra arrestime dhe pesë persona të dënuar me burg. Ndërkohë, akuzat për sulme antisemite pasuan përleshjet, kjo e ndodhur pas provokimeve nga ana e disa tifozëve izraelitë, të cilët akuzohen për përdorim të dhunës ndaj qytetarëve, shkatërrim të simboleve pro-palestineze dhe përdorim të sloganeve raciste ndaj palestinezëve dhe arabëve.
Aston Villa theksoi se mbetet në kontakt të vazhdueshëm me klubin Maccabi Tel Aviv dhe autoritetet përkatëse, duke shtuar se siguria e tifozëve dhe komunitetit lokal është prioriteti kryesor në këtë situatë. Skuadra angleze ka koleksionuar 2 fitore në po kaq ndeshje, ndërsa Maccabi Tel Aviv ka grumbulluar vetëm 1 pikë, në atë barazim pa gola ndaj PAOK-ut.
