Mbrojtësi i majtë i Olimpijas së Lubjanës, Mario Jurçeviq, me shumë mundësi nuk do të transferohet te Cërvena Zvezda e Beogradit për shkak se babai i tij është kroat. Kështu të paktën ka shkruar gazeta kroate Veçernji List duke cituar media beogradase.
Jurçeviqit pas pak ditësh i përfundon kontrata me klubin slloven dhe ka pasur raportime për një kalim te tij te klubi serb.
Por tifozët e Zvezdës “Delije”, kanë kërcënuar me bojkot nëse ai transferohet nga klubi. Kjo ka shtyrë drejtuesit e klubit që të heqin dorë.
“’Delije’ nuk udhëheqin klubin, por mendimi i këtij grupi është shumë i rëndësishëm. Kur bëhet fjalë për angazhimin e futbollistëve kroatë apo atyre që kanë luajtur për Partizanin, qëndrimi i tifozëve është i qartë – nuk vjen në shprehje”, ka cituar gazeta kroate një burim.
Tifozët e Zvezdës, të njohur edhe për qëndrimin anti-shqiptar dhe për veprat e shumta të dhunës dhe huliganizëm, nuk kanë ndryshuar mendje as kur trajneri Dejan Stankoviq ka treguar se nëna e Jurçeviqit është serbe. I është thënë atij, sipas Veçenji List, se një lojtar me emër dhe mbiemër të tillë nuk mund të luaj për Zvezdën.
Zvezda në vitin 2018 kishte shqyrtuar mundësinë e transferimit të brazilianit Sammir, por pasi tifozët e kuptuan këtë, janë ndërprerë negociatat. Nuk ka pasur diskutime për këtë. Sikur Sammir mos të kishte të kaluar te përfaqësuesja kroate, nuk do të ishte e pamundur.
Mario Jurçeviq ka mundur të marr edhe pasaportë të Serbisë për shkak të nënës serbe. Ai ka shtetësi të Sllovenisë dhe asnjëherë nuk ka luajtur për klube kroate.
