Një tifoz është në gjendje të rëndë shëndetësore, pasi u rrëzua nga tribuna gjatë ndeshjes mes Anglisë dhe Kroacisë në Euro 2020.
Thuhet se tifozi u rrëzua nga tribuna pak pasi kishte filluar ndeshja në Wembley të dielën.
Një zëdhënës i stadiumit në Londër konfirmoi se tifozi në fjalë mori tretman mjekësor në vendin e ngjarjes dhe pastaj u dërgua në spital.
“Mund të konfirmojmë se një tifoz u rrëzua nga tribuna pak pasi nisi ndeshja mes Anglisë dhe Kroacisë në stadiumin Wembley”, tha zëdhënësi.
“Ai mori tretman mjekësor në vendin e ngjarjes dhe pastaj u dërgua në spital në gjendje të rëndë. Ne do të vazhdojmë të punojmë me UEFA-n për t’u siguruar se kjo çështje do të hetohet plotësisht dhe jemi duke e vëzhguar gjendjen”, shtoi ai.
Anglia e fitoi 1:0 ndeshjen e saj hapëse në grup falë golit të Raheem Sterling.
