Së paku 39 imigrantë kanë vdekur pas përmbytjes së dy barkave afër brigjeve të Tunizisë të martën. Ata u përpoqën ta kalonin Mesdheun për të arritur në ishullin italian, Lampedusa, tha Ministra e Mbrojtjes e Tunizisë.
Roja bregdetare arriti të shpëtonte 165 persona, ndërsa autoritetet janë duke i vazhduar kërkimet për më shumë të mbijetuar të mundshëm, tha zëdhënësi i kësaj ministrie, Mohamed Zekri. Ai shtoi se të gjithë të vdekurit ishin nga Afrika Subsahariane.
Bregdeti i qytetit Sfax në Tunizi është bërë pikë e madhe e imigrimit të njerëzve që po ikin nga varfëria dhe konfliktet në Afrikë dhe në Lindjen e Mesme, duke kërkuar një jetë më të mirë në Evropë, shkruan Reuters, transmeton Gazeta Express.
Në vitin 2019, rreth 90 imigrantë afrikanë e humbën jetën, kur barka me të cilën po lundronin u përmbyt afër bregdetit tunizian pasi ishte nisur për në Evropë nga Libia, në një nga incidentet më të rënda me të cilat janë përballur autoritetet tuniziane.
Në vitin 2020, numri i imigrantëve tunizianë që shkuan në tokën italiane u pesëfishua dhe shkoi në 13.000, sipas një grupi për të drejtat e njeriut. Kjo ka ardhur si pasojë e vështirësive ekonomike në shtetin e Afrikës Veriore.
