Një ditë pas ngjarjes së rëndë në Himalaje, autoritetet nepaleze kanë konfirmuar bilancin tragjik të ortekut që goditi malin Yalung Ri, në distriktin Dolakha të Nepalit verilindor. Të paktën shtatë alpinistë, pesë të huaj dhe dy nepalezë, kanë humbur jetën, ndërsa operacionet e kërkim-shpëtimit vijojnë në terren të vështirë.
Sipas agjencisë së ekspeditave Seven Summit Treks, orteku ndodhi të hënën në mëngjes, rreth orës 09:00 me orën lokale (03:15 GMT), pranë kampit bazë të malit. Deri më tani janë gjetur trupat e dy viktimave, ndërsa pesë të tjerë vijojnë të jenë të zhdukur nën shtresat e trasha të dëborës.
Në mesin e viktimave janë dy italianë, një kanadez, një gjerman, një francez dhe dy nepalezë, që shërbenin si guida malore. Tetë persona të tjerë janë shpëtuar dhe ndodhen në Katmandu, ku po marrin trajtim mjekësor.
Kreu i Seven Summit Treks, Mingma Sherpa, tha se trupat e pesë alpinistëve të zhdukur “mund të ndodhen 3 deri në 5 metra nën dëborë” dhe se kërkimet mund të zgjasin disa ditë për shkak të terrenit të rrezikshëm.
Autoritetet vendore raportojnë se përpjekjet e shpëtimit po pengohen nga moti i keq dhe vështirësitë logjistike, që kanë bërë të pamundur fluturimet e helikopterëve në zonë. Zëvendës-shefi i policisë, Gyan Kumar Mahato, tha se një helikopter arriti të ulej vetëm në zonën Na Gaun, rreth pesë orë larg kampit bazë.
Një nga alpinistët e mbijetuar tregoi për The Kathmandu Post se grupi kishte kërkuar ndihmë për disa orë, por ndihmat kishin mbërritur me vonesë.
“Sikur shpëtimi të kishte ardhur në kohë, mund të ishin shpëtuar më shumë jetë”, tha ai.
Sipas mediave vendase, grupi i alpinistëve po përgatitej të ngjitej në malin Dolma Khang (6,332 metra), ndërsa Yalung Ri (5,630 metra) ishte pjesë e fazës së aklimatizimit përpara ngjitjes kryesore.
Ndërkohë, në një incident të ndarë, vijojnë kërkimet në perëndim të Nepalit për dy alpinistë italianë të zhdukur, Stefano Farronato dhe Alessandro Caputo, të cilët po tentonin ngjitjen në malin Panbari. Anëtari i tretë i grupit, Velter Perlino, 65 vjeç, është shpëtuar dhe ndodhet jashtë rrezikut për jetën.
Ngjarja ndodh në një periudhë të frekuentuar nga alpinistët, pasi vjeshta konsiderohet stina më e përshtatshme për ngjitjet malore në Nepal. Megjithatë, moti i paqëndrueshëm dhe ortekët e papritur mbeten rrezik serioz.
Javën e kaluar, cikloni Montha solli reshje të dendura dëbore në Himalaje, duke bllokuar dhjetëra alpinistë në rajonet malore, përfshirë edhe zonën pranë Everestit.
