Ende pa u shuar tensioni që ndolli në Moskë rebelimi i Yevgeny Prigozhin me mercenarët e tij të grupit Wagner, Rusisë i është dashur të përballet edhe me frikën që përcjellin perëndimorët.
Siç Moska zyrtare pretendon, dy avionë luftarakë britanikë janë kapur “mat” teksa po i afroheshin kufirit të saj në Detin e Zi.
Sipas tyre dy avionë luftarakë Su-27 thuhet se kanë fiksuar momentin kur tre avionë ushtarakë britanikë po i afroheshin kufirit rus.
“Kur avionët luftarakë rusë u afruan, avionët e huaj luftarakë u kthyen dhe u distancuan nga kufiri rus”, tha ministria e Mbrojtjes në një deklaratë.
Sipas rusëve avionët e përfshirë në këtë incident ishin dy avionë britanikë Typhoon të shoqëruar nga një aeroplan zbulimi RC-135.
“Aeroplanët rusë u kthyen të sigurt në fushën e tyre ajrore. Nuk ka pasur shkelje të kufirit rus”, sqaroi ministria.
Në një klip të shkurtër të publikuar prej tyre, shihet një RC-135 me togfjalëshin “Royal Air Force” të shkruar në njërën anë.
Incidenti ndodh në një kohë kur shefi i grupit Wagner u rishfaq me një audiomesazh, dy ditë pasi udhëhoqi një rebelim të lënë përgjysmë shumë pranë Moskës.
Ndërsa tensionet rriten, Yevgeny Prigozhin tha se ai kurrë nuk kishte synuar të përmbyste qeverinë, duke shtuar se luftëtarët e tij e kishin ndalur fushatën e tyre për të shmangur gjakderdhjen.
“Ne dolëm për të protestuar, jo për të rrëzuar qeverinë e vendit. Marshi ynë tregoi shumë gjëra që diskutuam më herët, si problemet serioze me sigurinë në vend”, tha ai.
Më tej theksoi se qëllimi i tij kishte qenë të parandalonte shkatërrimin e milicisë së tij Wagner dhe të detyronte përgjegjësinë ndaj komandantëve që kishin dështuar në fushatën ushtarake të Rusisë në Ukrainë. Ai pretendoi se luftëtarët e tij nuk ishin përfshirë në luftime në terren në Rusi dhe i vinte keq që duhej të rrëzonin aeroplanët rusë që kishin qëlluar mbi ta.
