Tre muaj pas hyrjes në fuqi të ndalimit të rrjeteve sociale për adoleshentët në Australi, rezultatet janë ende të paqarta dhe ndikimet ndryshojnë shumë nga një familje në tjetrën.
Sipas Caroline Thain, këshilltare kombëtare klinike pranë organizatës për shëndetin mendor Headspace, rreth një në dhjetë adoleshentë që vizitojnë qendrat e tyre kanë përmendur ndalimin si arsye për të kërkuar mbështetje.
Kryeministri Anthony Albanese ka përmendur si sukses fshirjen e 4.7 milionë llogarive australiane në platformat kryesore si TikTok, Instagram, Facebook, YouTube dhe Twitch, por ekspertët theksojnë se ky është vetëm një tregues teknik, jo një pasqyrë e plotë e ndikimit tek të rinjtë.
Komisionerja për sigurinë, Julie Inman Grant, ka nisur një studim afatgjatë që do të ndjekë më shumë se 4 mijë fëmijë dhe familje për dy vjet. Studimi përfshin sondazhe dhe ndjekje vullnetare të përdorimit të smartfonëve, si dhe të dhëna të shkollave dhe shëndetit. Qëllimi është të matet ndikimi në mirëqenien, shëndetin mendor dhe sjelljen online të adoleshentëve.
Ndërkohë, raportet nga shkollat tregojnë pak ndryshime, pasi shumë prej tyre tashmë ndalojnë përdorimin e pajisjeve gjatë orarit të mësimit.
Disa adoleshentë kanë gjetur mënyra për të kaluar ndalimin. Sarai Ades, 14 vjeç, thotë: Kam krijuar llogari të reja në TikTok dhe Snapchat, dhe Instagram ende nuk ka shënuar llogarinë time si të mitur. Ishte shumë më e lehtë se sa mendonim. Ndërsa Grace Guo, 14 vjeç, shton: Ndalimi më ka bërë të kuptoj që shpesh varen tepër nga rrjetet sociale dhe që ka mënyra të tjera për të komunikuar dhe për t’u argëtuar.
Ekspertët paralajmërojnë se ndikimi i ndalimit do të varet nga fakti nëse i gjithë rrethi social i adoleshentëve respekton ndalimin dhe se disa kanë gjetur mënyra alternative për t’u lidhur online, si për shembull duke përdorur WhatsApp, që nuk është pjesë e ndalimit.
Thain këshillon qeveritë që duan të ndjekin shembullin australian të përfshijnë të rinjtë në zhvillimin e politikave dhe të mos supozojnë se dinë më mirë se ata.
“Adoleshentët duhet konsideruar ekspertë të jetës së tyre dhe të përfshihen në çdo fazë të politikës” thotë ajo.
Rezultatet e plota të ndikimit pritet të dalin më vonë gjatë vitit, kur të përfundojnë vlerësimet e organizatës e-Safety.
