Këto janë pamjet e banesës së shefit të Seksionit të Krimeve në Komisariatin e Shkodrës, Pëllumb Shpati, i cili mëngjesin e kësaj të premteje ra pre e një sulmi me tritol.
Sasia e eksplozivit e vendosur në murin rrethues të shtëpisë së efektivit ka shkaktuar dëme materiale të konsiderueshme, mes të cilave dhe në këto 3 makinat që ndodheshin në oborrit të banesës.
Babai i shefit të Seksionit të Krimeve, Gjergj Shpati, për mediat tha se nuk kanë konflikte me njeri dhe se dyshojnë që ngjarja të ketë ardhur për shkak të detyrës së të birit.
Sulm për shkak të detyrës është dhe pista kryesore që po heton policia dhe prokuroria e Shkodrës.
Këtë version mësohet të ketë mbajtur edhe vetë Pëllumb Shpati përpara hetuesve.
49-vjeçari jetonte në një vile 3-katëshe së bashku me familjet e 2 vëllezërve të tij, që gjithashtu janë efektivë të policisë së Shkodrës.
Hetuesit kanë administruar pamje filmike me qëllim identifikimin e autorëve, por deri tani nuk kanë mundur të bien në gjurmët e tyre.
Shpërthimi me tritol në banesën e shefit të Seksionit të Krimeve, e çon në 6 numrin e sulmeve me lëndë plasëse në harkun kohor të një viti në Shkodër, me shënjestër efektivët e policisë.
