Presidenti i SHBA-së, Donald Trump, do të nënshkruajë këtë të premte (5 shtator) urdhrin ekzekutiv për njohjen e Departamentit të Mbrojtjes si Departament Lufte dhe njohjen Sekretarit të Mbrojtjes Pete Hegseth si Sekretar i Luftës.
Pentagoni – i cili mbikëqyr shërbimet e armatosura të SHBA-së – është pasardhësi i Departamentit të Luftës, i cili u krijua për herë të parë si një agjenci në nivel kabineti në vitin 1789 dhe ekzistoi deri në vitin 1947.
Përgjegjësia për krijimin e departamenteve ekzekutive i takon Kongresit të SHBA-së, që do të thotë se do të kërkohej një amendament për të ndryshuar ligjërisht emrin e departamentit.
“Emri ‘Departamenti i Luftës’ përcjell një mesazh më të fortë gatishmërie dhe vendosmërie krahasuar me ‘Departamentin e Mbrojtjes’, i cili thekson vetëm aftësitë mbrojtëse”, thuhet në tekstin e urdhrit ekzekutiv që pritet të dalë këtë të premte, raporton BBC.
Në një përpjekje për të “projektuar forcë dhe vendosmëri”, urdhri autorizon sekretarin e mbrojtjes, departamentin e tij dhe zyrtarët vartës që të përdorin titujt e rinj si emra dytësorë.
Urdhri gjithashtu udhëzon Hegseth të rekomandojë dhe të përfshijë veprime legjislative dhe ekzekutive për të ecur drejt një riemërtimi të përhershëm të departamentit, pasi Trump nuk mund ta ndryshojë zyrtarisht emrin pa miratimin e Kongresit.
Departamenti i Luftës u themelua nga George Washington, por u riemërua pas Luftës së Dytë Botërore.
Sipas urdhrit ekzekutiv, rivendosja e emrit të tij “do ta theksojë fokusin e këtij Departamenti në interesin tonë kombëtar dhe do t’u sinjalizojë kundërshtarëve gatishmërinë e Amerikës për të zhvilluar luftë për të siguruar interesat e saj”.
