Ish-presidenti amerikan Donald Trump e ka quajtur aktakuzën federale kundër tij ‘qesharake dhe të pabazë’. Ky është reagimi i parë i Trump në daljen e tij të parë publike që nga momenti i shpalljes së akuzave.
Një aktakuzë prej 37 pikash e bërë publike më 9 qershor e akuzon ish presidentin për mbajtjen e dokumenteve sekrete në pronën e tij në Mar-a-Lago. Në dy fjalime të fushatës Trump tha se aktakuza përbënte “ndërhyrje në zgjedhje” nga FBI-ja “e korruptuar” dhe departamenti i drejtësisë.
Trump, ka dyfishuar pretendimet se është viktimë e asaj që ai e quan një “gjueti shtrigash”.
“Ata kanë nisur një gjueti shtrigash njëra pas tjetrës për të provuar të ndalojnë lëvizjen tonë, për të penguar vullnetin e popullit amerikan. Akuza qesharake dhe e pabazë ndaj meje nga Departamenti i Padrejtësisë i armatosur i administratës Biden do të zbresë si ndër abuzimet më të tmerrshme të pushtetit në historinë e vendit tonë”, u shpreh Trump.
Ndër të tjera ish-lideri amerikan shtoi se po mundin republikanët duke fituar kudo, teksa i drejtohej mbështetësve që ishin prezentë.
“Ne me të vërtetë po fitojmë shumë. Ne po fitojmë kudo, po mundim republikanët dhe po mundim dreqin nga Joe Biden. Prandaj po e bëjnë. Nëse nuk do të isha, më lejoni t’ju them nëse nuk do të isha, nuk do të kishte gjueti shtrigash. Nuk do të kishte aktakuzë. Nëse do të humbja, do të fitoja shumë kundër demokratëve”, shtoi më tej ai.
Ai akuzohet se ka sfiduar me dashje kërkesat e Departamentit të Drejtësisë për kthimin e dokumenteve të klasifikuara, duke kërkuar ndihmës në përpjekjet e tij për të fshehur të dhënat dhe madje duke u thënë avokatëve të tij se donte të kundërshtonte një thirrje për materialet e ruajtura në rezidencë.
