“As edhe një amerikan nuk është vrarë apo plagosur gjatë sulmeve të djeshme. Irani duket se po tërhiqet”, deklaroi presidenti Donald Trump, gjatë fjalimit zyrtar nga Shtëpia e Bardhë, duke theksuar se SHBA është e gatshme të bëjë paqe me ata që e kërkojnë atë.
Trump njoftoi edhe për sanksione ekonomike të reja ndaj regjimit të Teheranit, si kundërpërgjigje ndaj sulmit iranian.
Gjithashtu, presidenti amerikan u bëri thirrje europianëve të largoheshin nga marrëveshja e Iranit për armët bërthamore dhe i kërkoi NATO-s që të përfshihej shumë më tepër në Lindjen e Mesme.
Sipas Trump-it, sulmi me 22 raketa i Teheranit mbi bazat irakiane, ku ishin vendosur ushtarët amerikanë, shkaktuan vetëm dëme të kufizuara.
“Sa të jem unë president i SHBA-së, Irani nuk do ta marrë ndonjëherë autorizimin për të patur një armë bërthamore”, premtoi Trump në fillim të deklaratës së tij./
