Presidenti amerikan Trump ka ndërprerë ndihmën ushtarake për Ukrainën pas përplasjes së tij me presidentin ukrainas Zelensky javën e kaluar, tha një zyrtar i Shtëpisë së Bardhë, duke thelluar çarjen që është hapur mes dy aleatëve të dikurshëm.
Masa vjen pasi Trump ndryshoi politikën e SHBA-së për Ukrainën dhe Rusinë me marrjen e detyrës në janar, duke përshtatur një qëndrim më pajtues ndaj Moskës dhe pas një përplasjeje shpërthyese me Zelensky-n në Shtëpinë e Bardhë të premten, në të cilin Trump e kritikoi atë se ishte mosmirënjohës për mbështetjen e Uashingtonit në luftën me Rusinë.
“Presidenti Trump ka qenë i qartë se ai është i përqendruar te paqja. Ne kemi nevojë që partnerët tanë të jenë të përkushtuar ndaj këtij qëllimi gjithashtu. Ne po ndalojmë dhe shqyrtojmë ndihmën tonë për të siguruar që ajo po kontribuon në një zgjidhje,” tha zyrtari të hënën, duke folur në kushte anonimiteti.
Shtëpia e Bardhë nuk kishte asnjë koment të menjëhershëm mbi shtrirjen dhe sasinë e ndihmës së prekur ose sa do të zgjaste ndalesa. Pentagoni nuk mund të jepte hollësi të mëtejshme.
Zyra e Zelensky nuk iu përgjigj menjëherë një kërkese të Reuters për koment dhe as ambasada e Ukrainës në Uashington.
Demokratët në Kongresin e SHBA e denoncuan këtë veprim, shkruan Reuters.
“Duke ngrirë ndihmën ushtarake për Ukrainën, Presidenti Trump ia ka hapur derën Putinit për të përshkallëzuar agresionin e tij të dhunshëm kundër ukrainasve të pafajshëm. Pasojat do jenë padyshim shkatërruese,” tha senatorja Jeanne Shaheen, kryedemokratja në Komitetin e Senatit për Marrëdhëniet me Jashtë.
Të hënën, Trump përsëri tha se Zelensky duhet të jetë më mirënjohës për mbështetjen amerikane pasi më herët iu përgjigj me zemërim një raporti të Associated Press që citonte Zelensky-n të thoshte se fundi i luftës është “shumë, shumë larg”.
“Kjo është deklarata më e keqe që mund të ishte bërë nga Zelensky dhe Amerika nuk do ta durojë atë për shumë kohë!” shkroi Trump në Truth Social.
