Presidenti amerikan Donald Trump ka deklaruar se udhëheqësit evropianë do të vizitojnë Shtetet e Bashkuara për të diskutuar mënyrat për t’i dhënë fund luftës në Ukrainë.
“Disa udhëheqës evropianë do të vijnë individualisht në vendin tonë të hënën ose të martën“, tha Trump, pa dhënë hollësi se cilët udhëheqës do të bëjnë udhëtimin përtej Atlantikut.
Gjithashtu ai shtoi se do të zhvillojë një bisedë me Presidentin rus Vladimir Putin “së shpejti”, duke theksuar se presioni ekonomik ndaj Rusisë do të intensifikohet.
Sekretari amerikan i Thesarit, Scott Bessent, konfirmoi se SHBA është e hapur për bashkëpunim me vendet evropiane për të vendosur sanksione ndaj shteteve që vazhdojnë të blejnë naftë ruse, me qëllim dobësimin e ekonomisë ruse.
Ai paralajmëroi se lufta po kthehet në një garë mes qëndrueshmërisë së ushtrisë ukrainase dhe ekonomisë ruse.
Bashkimi Evropian ka reduktuar ndjeshëm importet e energjisë nga Rusia që prej vitit 2022 dhe ka vendosur një afat deri në vitin 2027 për t’i ndërprerë plotësisht.
Komentet e Trump vijnë pasi Rusia nisi sulmin e saj më të madh ajror ndonjëherë në Ukrainë, duke vrarë të paktën katër persona dhe duke i vënë flakën një ndërtese kryesore qeveritare në kryeqytetin e Kievit.
Duke folur për median ndërkombëtare, Zelensky tha se vazhdimi i blerjes së naftës dhe gazit rus nga partnerët evropianë nuk ishte “i drejtë”.
