Presidenti i SHBA-së, Donald Trump nuk ka më temperaturë dhe gjendja e tij po përmirësohet pas hospitalizimit me COVID-19, por ende nuk është jashtë rrezikut, ka thënë mjeku i tij, Dr. Sean Conley, të shtunën mbrëma sipas kohës amerikane, raporton Reuters.
“Pjesën më të madhe të pasditës e ka kaluar duke punuar, ai ka lëvizur pa telashe në dhomën e tij në spital”, ka thënë Conley përmes një deklarate, transmeton KOHA.
Vetë Trumpi ka thënë të shtunën se ndihet “shumë më mirë” porse ditët në vijim do të jenë “testi i vërtetë” i trajtimit të tij për COVID-19, duke përmbledhur kështu një ditë mesazhesh kundërthënëse nga Shtëpia e Bardhë rreth gjendjes së tij shëndetësore.
