Një person i arrestuar së fundmi për vrasjen e ish-partneres së tij në Torremolinos, Malaga të Spanjës, më 17 Maj, raportohet të ketë dhënë një rrëfim spontan për policinë atje. Një rrëfim që do zgjidhte një mister 9 vjeçar.
Italiani Marco Gaio Romeo, 45 vjeç, sipas asaj që shkruajnë mediat spanjolle e italiane raportohet të ketë pranuar autorësinë për vrasjen e Sibora Gaganit, italo-shqiptares me të cilën kishte një lidhje sentimentale në 2014-n, e që rezulton e zhdukur që prej asaj kohe. Misteri për fatin e së resë u raportua gjerësisht në atë kohë.
Sipas asaj që raporton media spanjolle SUR, rrëfimi ndodhi teksa 45-vjeçari po shoqërohej në korridoret e stacionit të policisë, dhe rrugës pa një fletushkë të ngjitur në mur për zhdukjen e Siborës.
![](https://tvklan.al/wp-content/uploads/2023/05/siboraaa.jpg)
![](https://tvklan.al/wp-content/uploads/2023/05/siboraaa.jpg)
Rrëfimi vjen në një kohë kur Marco ka refuzuar të japë çdolloj dëshmie para autoriteteve hetimore spanjolle, që po hetojnë vrasjen me thikë të Paula-s, 28-vjeçares me të cilën ai kishte pasur histori dashuri deri në Mars të këtij viti.
Burime thonë për SUR se autori i dyshuar u tha oficerëve të policisë se trupi i Siborës ishte fshehur mes mureve të apartamentit në të cilin ata jetonin së bashku në Torremolinos, në 2014-n. Madje i dyshuari u ofrua që t’i çonte hetuesit tek vendi ekzakt ku e kishte fshehur trupin e saj.
Rrëfimi i tij është tashmë kyç në hetimet për zhdukjen e Siborës, ndonëse Marco nuk ka dhënë një dëshmi zyrtare para policisë, në prani të avokatit apo të gjykatësit. Deri më tani, versioni i vetëm që hetuesit kanë është dëshmia e tij e papritur dhe informale, në korridoret e godinës së policisë.
![](https://tvklan.al/wp-content/uploads/2023/05/apratamenti-1024x576.webp)
![](https://tvklan.al/wp-content/uploads/2023/05/apratamenti-1024x576.webp)
Megjithatë, nisur nga ky rrëfim, gjyqtari që ka në dorë dosjen ka rihapur çështjen dhe urdhëroi një kontroll në shtëpinë ku Marco dhe Sibora jetuan nga 2011 deri në 2014-n. Pasditen e së hënës, rreth 20 oficerë policie shkuan në këtë pronë, një apartament i ndarë në dy kate në qendër të Torremolinos dhe inspektuar çdo pjesë të murit, në kërkim të trupit të saj, apo çdo indicie që mund të çonte në gjetjen e saj.
Hetuesit përdorën detektorë dhe çanë murin në zona të ndryshme të apartamentit, për të parë nëse brenda kishte mbetje njerëzore. Ata po ashtu inspektuan tualetin dhe dhomat e tjera. Por nuk arritën të gjenin asgjë. Mëngjesin e së martës, specialistët e kriminalistikës u rikthyen në këtë shtëpi dhe kërkuan në dhoma të tjera, por pa mundur të gjenin një trup.
![](https://tvklan.al/wp-content/uploads/2023/05/sibora.webp)
![](https://tvklan.al/wp-content/uploads/2023/05/sibora.webp)
Sibora ishte 22-vjeçe kur u zhduk nga Torremolinos. Gjatë thuajse 9 vitesh, të gjitha përpjekjet për ta gjetur kanë qenë të kota, deri javën e shkuar, kur policia zbuloi se Marco, i arrestuar për vrasjen Paula-s, kishte qenë gjithashtu partneri i Siborës. Ai ishte personi i fundit me të cilin Sibora kishte pasur kontakt përpara se të zhdukej. Më 7 Korrik të 2014-s, ata kishin pasur një bisedë në WhatsApp dhe për të renë nuk u dëgjua më asgjë.
Pak përpara se të zhdukej, Sibora, e cila kishte shkuar nga Roma në Spanjë, u nda nga ish-partneri dhe u zhvendos në një apartament në Calle Hoyo, në Torremolinos. Që prej fillimit zhdukja e saj u konsiderua nga policia “me rrezik të lartë”. Kjo për shkak se 22-vjeçarja ishte larguar pa marrë telefonin e saj celular, pa marrë rrobat apo sende të tjera personale.
Media spanjolle SUR shkruan se vrasësi i dyshuar ka një histori për dhunë ndaj grave, megjithatë, nuk rezulton që Sibora apo Paula të kenë bërë ndonjëherë më parë denoncim për të. Hetimet për rastin vijojnë.
![](https://tvklan.al/wp-content/uploads/2023/05/chi-l-ha-visto-24-maggio-2-1024x576.jpg)
![](https://tvklan.al/wp-content/uploads/2023/05/chi-l-ha-visto-24-maggio-2-1024x576.jpg)
Ndërkohë mediat italiane raportojnë se rasti i saj është trajtuar edhe në programin e njerëzve të humbur, “Chi l’ha visto?”, ku tashmë me zhvillimet e reja është trajtuar sërish. Në një reagim për këtë program, nëna e saj, Elisabeta, u shpreh e revoltuar që nuk ishte dëgjuar asnjëherë nga autoritetet kur kishte denoncuar pikërisht të dashurin e të bijës për dhunë./tvklan.al