Presidenti i SHBA-së, Donald Trump, ka mbajtur tubimin e parë të fushatës së tij që nga fillimi i kufizimeve për shkak të koronavirusit, para një turme e cila ishte më e vogël se sa që u prit, ka shkruar BBC.
Trump tha në fillim të javës se pothuajse një milion njerëz kishin kërkuar bileta për këtë ngjarje në qytetin Tulsa të Oklahomas.
Por, arena me 19,000 ulëse nuk u mbush dhe planet e tij që t’i drejtohet edhe turmave “jashtë arenës” nuk u realizuan.
Ata që morën pjesë në tubim nënshkruan një dokument i cili mbron fushatën e Trumpit nga përgjegjësia nëse dikush sëmuret. Disa orë para së të fillonte ngjarja, zyrtarët thanë se gjashtë anëtarë të stafit kishin testuar pozitiv me koronavirus.
Sidoqoftë nuk është e qartë pse pjesëmarrja ishte më ulët sesa që pritej. Trump i cili foli pothuajse dy orë për tema të ndryshme, i quajti të pranishmit “luftëtarë”, dhe i fajësoi mediat dhe protestuesit për mos ardhjen e më shumë njerëzve.
Sa i përket koronavirusit, Trump tha se kishte inkurajuar zyrtarët që të ngadalësonin testimin sepse kjo bënte që më shumë raste të zbuloheshim.
“Ja ku është gjëja e keqe: kur bën testim të madh, do të gjesh më shumë raste” i tha ai turmës brohoritëse. “Prandaj ju thashë, ngadalësoni testimet. Por ata testojnë dhe vazhdojnë të testojnë”.
Më vonë një zyrtar i Shtëpisë së Bardhë tha se është e qartë që presidenti po “tallej”.
Presidenti foli gjithashtu për protestat kundër racizmit, dhe rrëzimin e statujave, duke thënë: ”Bandat majtiste po përpiqen të vandalizojnë historinë tonë, të përdhosin monumentet tona të bukura, të rrëzojnë statujat, dhe të dënojnë dhe persekutojnë këdo që nuk i përkulet kërkesës së tyre për kontroll total. Nuk e lejojmë këtë”, i tha ai turmës.
