Një ditë para se ta festojë ditëlindjen e 24-të, Aly Abdelazem, po shijon një makiato në qendër të Prishtinës. Blogeri egjiptian me këtë udhëtim po e shënon numrin 41 në listën e shteteve që ka vizituar deri tani.
“Është shumë e mirë”, thotë ai pasi provon gëllënjkën e parë.
“Mendoj që mund ta krahasosh me makiatot e gjithë botës, por ajo që s’mund ta krahasoni është çmimi. Sepse nëse do të blesh makiato të këtij kualiteti, kudo në botë, do të kushtonte 5 apo 6 euro, në ‘Starbucks’ apo kudo tjetër. E këtu kushton 50 cent apo 1 euro”, shton ai. E kjo është një informatë që do t’u hyjë në punë mbi shtatë mijë ndjekësve të tij në rrjetin social “Instagram”, nëpërmjet të cilit ai promovon vendet që viziton.
Abdelazem, student i bioenergjetikës në Universitetin “Hochschule Rhein-Waal” në Kleve të Gjermanisë, për KOHËN, zbulon detaje interesante nga udhëtimet e tij, duke theksuar mikpritjen që e gjeti në vendet ballkanike. Ai porosit egjiptianët dhe njerëzit e vendeve të Lindjes së Mesme, të vijnë në Kosovë.
Kosova, vendi i 41-të në listën e shteteve që ka vizituar
Aly ka tre vjet që po qëndron për studime në Gjermani. Ai udhëton gjithandej botës, por kryesisht në Evropë.
“Kam një mesazh për të gjithë egjiptianët dhe të tjerët në Lindje të Mesme: Ejani në Kosovë, vizitojeni këtë vend. Është shumë i mirë, është shumë i lirë. Të gjithë ju presin mirë dhe do të befasoheni që kemi shumë të përbashkëta mes arabëve, popujve të lindjes dhe popullit të Kosovës. Kështu që, ju lutem ejani vizitojeni Kosovën”, thotë ai. Në “Instagram” ai ka ndarë me ndjekësit e tij fotografi të ndryshme nga Kosova. Në njërën prej tyre pozon para flamurit të Egjiptit, të ekspozuar në Muzeun Kombëtar të Kosovës, në mesin e flamujve të shteteve që e kanë njohur pavarësinë. Në një fotografi tjetër, ai i njofton të tjerët me byrekun, një ushqim që, sipas tij, është shumë i shijshëm dhe “nuk kushton as 1 euro”.
