Sezoni turistik në Durrës vijon të jetë ne shifra te larta edhe pas pikut të verës. Menaxherët e hoteleve në qytetin bregdetar bëjnë të ditur se prenotimet për muajin shtator dhe tetor po ecin mjaft mirë, duke u shndërruar në një tregues pozitiv për turizmin në vijimësi.
“Mund të quhet një sezon i mirë sepse dhe rezervimet që kemi janë deri në fund të tetorit”, u shpreh Blerim Norja, menaxher hoteli.
Pushuesit e huaj, të cilët kanë zgjedhur bregdetin e Durrësit për ditët e tyre të pushimit, shprehen të kënaqur me kushtet, akomodimin dhe çmimet. Ky turist nga Rumania thotë se u njoh me destinacionin përmes platformës Booking dhe vendosi të vinte menjëherë.
“Ne vijmë për herë të parë në Durrës, gjithçka na duket shumë mirë. E pamë në Booking dhe na pëlqeu, kushtet janë të mira, ushqimi, akomodimi, gjithçka. Kemi zgjedhur paketën “all inclusive” dhe çmimet janë të mira, krahasuar me vende si Spanja, Italia, Gjermania etj.“, tha një turist.
Sipas operatorëve turistikë, turizmi i shtatorit dhe tetorit po sjell një dimension të ri për zhvillimin ekonomik të zonës dhe për promovimin e Durrësit në tregun ndërkombëtar.
