Numri i turistëve të huaj që e vizituan Spanjën ra për 75 për qind në korrik në krahasim me një vit më parë, sipas të dhënave të publikuara të martën.
Kjo rënie bëri që shteti i Evropës Jugore të ketë dhjetëra miliardë euro më pak të hyra këtë vit, të cilat i realizonte zakonisht në vjetët para pandemisë, shkruan The Guardian.
Spanja, që zakonisht është vendi i dytë me më së shumti vizitorë në botë, pas Francës, mesatarisht ka pasur 80 milionë turistë në vit. Sidoqoftë, vetëm 2.5 milionë e vizituan këtë vend në korrik, sipas të dhënave të Institutit Kombëtar Spanjoll të Statistikave.
Turistët e huaj i shpenzuan 14.29 miliardë euro në Spanjë deri në korrik, 73 për qind më pak se 52.36 miliardë eurot që u shpenzuan vitin e kaluar.
Britanikët mbetën grupi më i madh që e vizitoi Spanjën gjatë shtatë muajve të parë të këtij viti, pavarësisht rënies prej 77 për qind në krahasim me vitin e kaluar.
Pandemia e ka goditur turizmin edhe në vendet e tjera, kryesisht për shkak të masave kufizuese në udhëtimet ndërkombëtare dhe kërkesave për izolim e testim.
