Nga sot trupat paqeruajtëse të KFOR-it në Kosovë do të udhëhiqen nga Turqia. Lajmi është bërë me dije nga agjencia turke e lajmeve “Anadolu”.
Në artikullin e publikuar dje, ata njoftojnë se të martën do të mbahet ceremonia e pranimit të komandës, e cila deri më tani ka qenë e udhëhequr nga trupat italiane.
Zyrtarët e Ministrisë Turke të Mbrojtjes Kombëtare, në një deklaratë lidhur me çështjen, cilësuan KFOR-in si një nga misionet më të rëndësishme në sigurimin e paqes dhe stabilitetit në Ballkan.
Burime theksojnë se që nga themelimi kanë vazhduar kontributet e tyre ndaj KFOR-it. “Turqia është aktualisht një nga vendet kryesore që ofron mbështetje për misionin e KFOR-it me njësitë tona rezervë operative shtesë”, thanë burimet.
Turqia renditet e dyta midis 27 vendeve për sa i përket kontributit me forca ushtarake.
Më tej, duke theksuar se kontributi i Turqisë ndaj KFOR-it do të vazhdojë pa u zvogëluar, burimet thanë se me alokimin e misionit të KFOR-it ndaj Turqisë, kanë filluar përpjekjet e koordinuara në lidhje me kontributin e njësive.
Turqia do ta marrë përsipër drejtimin e komandës në kohën e trazirave të Kosovës me Serbinë, pas sulmit terrorist të 24 shtatorit ku mbeti i vrarë rreshteri i Policisë së Kosovës, Afrim Bunjaku.
