Turqia urdhëroi arrestimin e 176 shërbyesve ushtarakë, për lidhje të dyshuara me rrjetin që Ankaraja e fajëson për përpjekjen për grushtshtet, tre vjet më parë.
Në njoftimin e prokurorisë thuhet se në mesin e atyre që përballen me arrestim janë: një kolonel, dy nënkolonelë, pesë majorë dhe shtatë kapitenë.
Operacioni përfshin ushtrinë, forcën ajrore dhe atë detare, thuhet në njoftim.
Ankaraja thotë se kleriku mysliman, Fethullah Gulen, e ka organizuar përpjekjen për puç në Turqi, më 15 korrik të vitit 2016.
Gulen, i cili jeton në Shtetet e Bashkuara, e mohon përfshirjen.
Në përndjekjen trevjeçare të autoriteteve, mbi 77,000 njerëz janë burgosur dhe rreth 150,000 shërbyes civilë dhe të tjerë janë pushuar ose suspenduar nga puna.
Aleatët perëndimorë të Turqisë dhe grupet e të drejtave të njeriut kanë kritikuar shkallën e përndjekjes, duke thënë se presidenti turk, Recep Tayyip Erdogan, e ka përdorur puçin e dështuar si pretekst për të heshtur kundërshtarët.
Ankaraja ka thënë se veprimet e tilla janë të domosdoshme përballë shkallës së kërcënimeve për sigurinë.
