Administratorët e llogarisë zyrtare të BBC-së në Twitter morën një surprizë të pakëndshme kur rrjeti social i cilësoi si media të financuar nga qeveria.
BBC kundërshtoi qëndrimin dhe i kërkoi Twitter “të zgjidhë çështjen sa më shpejt të jetë e mundur”.
“BBC është dhe ka qenë gjithmonë i pavarur. Ne financohemi nga publiku britanik përmes tarifës së licencës,” tha media prestigjoze në një deklaratë.
Elon Musk, kreu i Twitter, u kritikua nga ata që mbajtën anën e BBC.
“Ne duhet t’i shtojmë më shumë hollësi ndikimit editorial, pasi ai ndryshon shumë. Unë në fakt nuk mendoj se BBC është aq i njëanshëm sa disa media të tjera të financuara nga qeveria, por është marrëzi e BBC-së të pretendojë se nuk ka ndikim. Me pak ndikim qeveritar, do të ishte një përshkrim i saktë në rastin e tyre”, tha kreu i Twitter.
