Një ushtar amerikan që po përballej me masa disiplinore ushtarake, kaloi përtej kufirit të armatosur rëndë nga Koreja e Jugut për në Korenë e Veriut, thanë zyrtarët amerikanë të martën. Ai bëhet amerikani i parë i arrestuar në Korenë e Veriut pas gati pesë vjetësh.
Dy zyrtarë të lartë amerikanë thanë se ushtari i arrestuar ishte i klasit të dytë, Travis King, i cili sapo ishte liruar nga një burg i Koresë së Jugut, ku ishte mbajtur me akuza për sulm. Ai do të përballej me veprime disiplinore ushtarake shtesë në Shtetet e Bashkuara.
King, i cili është në fillim të të 20-ave, po shoqërohej në aeroport për t’u kthyer në Fort Bliss, Teksas. Por në vend që të hipte në aeroplan, ai u largua duke iu bashkuar një turi në fshatin kufitar Korean të Panmunjom, ku vrapoi përtej duke kaluar kufirin.
Në një konferencë për shtyp në Pentagon të martën, Sekretari i Mbrojtjes Lloyd Austin, nuk përmendi e emrin e ushtarit, por konfirmoi se një pjesëtar i shërbimit amerikan ka të ngjarë që tani të jetë në paraburgim në Korenë e Veriut.
“Ne jemi duke monitoruar dhe hetuar nga afër situatën. Po punojmë për të njoftuar të afërmit e ushtarit,”- tha Austin, duke vënë në dukje se ai ishte i shqetësuar për mirëqenien e fizike të ushtarit.
Detaje rreth King, duke përfshirë qytetin e tij të lindjes dhe se me çfarë akuzash shtesë do të përballej, nuk u bënë menjëherë publike. Është ende e paqartë se si ai arriti të largohej nga aeroporti ndërsa po e shoqëronin.
Komanda e OKB-së e udhëhequr nga Amerika tha se ai besohet të jetë në paraburgim në Korenë e Veriut dhe se komanda po punon me homologët e saj të Koresë së Veriut për të zgjidhur incidentin. Media shtetërore e Koresë së Veriut nuk raportoi menjëherë për kalimin kufitar.
Rastet e amerikanëve ose koreano-jugorëve që dezertojnë në Korenë e Veriut janë të rralla, megjithëse më shumë se 30,000 koreano-veriorë kanë ikur në Korenë e Jugut për të shmangur shtypjen politike dhe vështirësitë ekonomike që nga fundi i Luftës Koreane të viteve 1950-1953.
Zëdhënësi i Departamentit të Shtetit, Mattheë Miller, thotë se Departamenti i Shtetit është në kontakt me departamentin e Mbrojtjes. Ushtari amerikan, sipas tij, e ka kaluar “me dashje dhe pa autorizim” kufirin për të shkuar në Korenë e Veriut. Apnews
