Liburn Aliu, ish-ministri i Kosovës në qeverinë e Albin Kurtit, është prezantuar sot si drejtori i ri i Autoritetit Portual Durrës.
Ai merr detyrën në vend të Kreshnik Bajraktarit, i cili e kishte drejtuar portin që prej korrikut 2024. Gjatë ceremonisë së dorëzimit të detyrës, Bajraktari u shpreh se Porti i Durrësit do të vazhdojë rrugën e zhvillimit dhe modernizimit nën drejtimin e ri.
“I uroj suksese në detyrën e re. Jam i bindur se nën drejtimin e tij, Porti i Durrësit do të vazhdojë me ritme të larta rrugën e zhvillimit”, deklaroi Bajraktari.
Në fjalën e tij të parë si drejtor, Aliu falënderoi qeverinë shqiptare për besimin dhe theksoi se Porti i Durrësit duhet të jetë një qendër e rëndësishme rajonale për transportin dhe tregtinë.
“Është nder i madh të jem sot këtu. Porti i Durrësit është porti i gjithë shqiptarëve dhe duhet të modernizohet për të qenë konkurrues në rajon. Maqedonia dhe Kosova duhen parë si pika të shpërndarjes së mallrave për gjithë rajonin”, u shpreh Aliu, duke shtuar me humor se “këtu më shohin si të Kosovës, atje më shohin si të Shqipërisë, por këtë detyrë do ta bëjmë bashkë”.
