Një 36-vjeçar ka përfunduar i plagosur rëndë në spitalin e Sarandës ditën e sotme (14 tetor) pasi ka marrë plagë të shumta me thikë në trup.
Sipas raportimeve nga policia, Leonard Poçi është plagosur me thikë në zonën e qafës, ndërsa po merr ndihmë mjekësore në Urgjencën e Spitalit të Sarandës.
36-vjeçari dyshohet se është plagosur gjatë një konflikti për motive të dobëta, me shtetasin me iniciale Dh. T., rreth 32 vjeç.
“Sot, rreth orës 21:10, në lagjen nr.1, dyshohet se gjatë një konflikti për motive të dobëta, shtetasi Dh. T., rreth 32 vjeç, ka goditur me mjet prerës, në zonën e qafës, shtetasin L. P., rreth 36 vjeç”, njofton policia.
Sipas News24, 36-vjeçari është përdorues i lëndëve narkotike, si edhe ka precedentë të mëparshëm penal për vjedhje.
Ndërkohë, policia ka nisur hetimet për zbardhjen e rrethanave të plagosjes së tij.
Njoftimi i policisë
Sot, rreth orës 21:10, në lagjen nr.1, dyshohet se gjatë një konflikti për motive të dobëta, shtetasi Dh. T., rreth 32 vjeç, ka goditur me mjet prerës, në zonën e qafës, shtetasin L. P., rreth 36 vjeç.
Shërbimet e Policisë kanë shkuar menjëherë në vendngjarje dhe falë veprimeve të shpejta bënë të mundur kapjen e autorit të dyshuar, shtetasin Dh. T, dhe shoqërimin e tij në Komisariatin e Sarandës, për veprime të mëtejshme hetimore.
Shtetasi L. P, aktualisht ndodhet në spitalin e Sarandës, nën kujdesin e mjekëve.
Vijon puna e grupit hetimor për sqarimin e plotë të rrethanave të ngjarjes.
