Blendi Çuçi ka reaguar pas vendimit të kryeministrit Edi Rama për ta shkarkuar atë nga posti i Ministrit të Brendshëm, ndërsa në vend të tij pritet të emërohet Taulant Balla.
Në mesazhin e tij, Çuçi falënderon Ramën për mbështetjen që ka marrë prej tij gjatë ushtrimit të detyrës së Ministrit të Brendshëm, teksa e konsideron atë “nder dhe përgjegjësi të madhe”.
Ndalur te puna e kryer prej tij në krye të Ministrisë përgjatë 2 viteve e gjysmë, Çuçi thotë se e ka kryer atë me integritet dhe se janë adresuar shumë sfida që lidhen me sigurinë, rendin publik e emigracionin.
Çuçi e mbyll reagimi e tij duke i uruar suksese Ballës për të vijuar me reformat transformuese në këtë ministri, duke e vënë theksin veçanërisht te Policinë e Shtetit.
“Falënderoj kryeministrin Rama për besimin dhe mbështetjen që më ka dhënë këto dy vite e gjysmë në detyrën e vështirë të Ministrit të Brendshëm. Për mua ka qenë nder dhe përgjegjësi e madhe të ushtroja këtë funksion të lartë publik dhe shumë të rëndësishëm. Prej ditës së parë kur e mora atë detyrë e deri më sot kam punuar e shërbyer me integritet dhe bashkë me skuadrën e Ministrisë së Brendshme kemi adresuar shumë sfida që lidhen me sigurinë, rendin publik, emigracionin, gjendjen civile dhe pushtetin vendor. Një falënderim i veçantë shkon për të gjithë ata që ishin krah meje në këtë rrugëtim sfidues. Suksese Taulantit në sfiden e re, për të vijuar me reformat transformuese në këtë ministri e veçanërisht në Policinë e Shtetit”, shkruan Çuçi.
Kryeministri Edi Rama bëri me dije vendimin mbrëmjen e kësaj të shtune (8 korrik), ndërsa propozimi do t’i shkojë zyrtarisht të hënë Presidentit Bajram Begaj.
Vendimi i Ramës erdhi pas ngjarjes së regjistruar në Borizanë të Krujës, ku pjesëtar të fisit të deputetit socialist, Rrahman Rraja dhunuan në mënyrë barbare dy kushërinj, pas një konflikti me ta për një gurore.
Më herët e gjithë trupa drejtuese e komisariatit të Krujës është shkarkuar dhe drejtues operacional e përgjegjës për rendin dhe sigurinë në territorin e Krujës është vendosur drejtuesi i parë, Tonin Vocaj.
Dy ditë më parë në media qarkulloi video ku dukeshin vëllezërit e deputetit Rraja dhe djali i tij, Rexhep Rraja i shpallur në kërkim, të pajisur me shkopa gome, ndërsa njëri prej vëllezërve me armë në dorë, teksa ushtronin dhunë ndaj dy vëllezërve të cilët vazhdimisht ishin ankuar se gurorja e familjes Rraja po i shkatërronte shtëpitë nga shpërthimet që kryheshin aty.
Çuçi reagoi duke e konsideruar dhunën të papranueshme, teksa theksoi se askush nuk është mbi ligjin dhe nuk mund t’u shpëtojnë përgjegjësive “në asnjë rrethanë”.
Ndërkohë, deputeti Rraja deklaroi dorëzimin e mandatit dhe largimin nga jeta politike, ndërsa i bëri thirrje djalit të tij që të dorëzohet në Polici.
