Ukraina njoftoi të mërkurën se Rusia kishte bombarduar më shumë se 100 zona gjatë 24 orëve të fundit, numri më i madh në një sulm të vetëm që nga fillimi i vitit.
Që nga nisja e ofensivës së tyre në shkurt 2022, forcat ruse kanë gjuajtur miliona predha artilerie në qytetet dhe fshatrat e Ukrainës pranë vijës së frontit, në lindje të vendit.
”Gjatë 24 orëve të fundit, armiku granatoi 118 lokalitete në 10 rajone”, tha ministri i Brendshëm ukrainas, Igor Klimenko në një mesazh të postuar në rrjetet sociale.
”Ky është numri më i madh i qyteteve dhe fshatrave që kanë pësuar një sulm që nga fillimi i vitit”, shtoi ai.
”Për më tepër, një sulm rus në një rafineri nafte në Kremenchuk, edhe pse nuk shkaktoi viktima, kërkoi dërgimin e më shumë se 100 zjarrfikësve për të luftuar zjarrin që pasoi për disa orë”, sipas Klimenkos.
Ukraina dhe aleatët e saj perëndimorë kanë frikë se Rusia do të intensifikojë sulmet e saj ndaj infrastrukturës energjetike të vendit përpara dimrit, siç bëri vitin e kaluar.
”Bombardimet gjatë natës vranë një person në rajonin e Kharkivit dhe një person tjetër në rajonin Kherson”, njoftuan zyrtarët lokalë.
Forcat Ajrore të Ukrainës njoftuan të mërkurën se kishin rrëzuar 18 nga 20 dronët rusë të lëshuar gjatë natës.
Nga ana e saj, Ministria ruse e Mbrojtjes njoftoi se kishte rrëzuar dy dronë ukrainas mbi rajonet e Bryansk dhe Kursk, që kufizohen me Ukrainën./ a.jor.
