“Kutia e Pandorës” është hapur. Ukraina ka qëlluar brenda territorit rus 6 raketa me rreze të gjatë veprimi, të prodhuara nga SHBA, duke shënuar kështu zyrtarisht shkeljen e “vijave të kuqe” të Moskës.
Zyrtarë të lartë amerikanë dhe ukrainas kanë konfirmuar se raketat Atacms të prodhuara nga SHBA janë hedhur në territorin rus për herë të parë gjatë luftës në Ukrainë.
Sulmi erdhi dy ditë pasi administrata e Joe Biden lejoi përdorimin e tyre dhe në ditën e 1000-të të luftës që nga fillimi i pushtimeve në shkallë të plotë të Rusisë. Zyrtarët e lartë konfirmuan lëshimet herët në mëngjes për New York Times .
Nga ana tjetër, Ministria ruse e Mbrojtjes pretendoi se kishte rrëzuar pesë nga gjashtë raketat e gjuajtura në Bryansk, në një sulm të ndodhur në orën 3:20 të mëngjesit me orën e Moskës.
Ministri i Jashtëm rus Sergei Lavrov ka thënë se sulmet në rajonin rus Bryansk nga Ukraina me raketa amerikane ishin një sinjal i qartë se Perëndimi dëshironte të përshkallëzonte konfliktin.
“Pa amerikanët, është e pamundur të përdoren këto raketa të teknologjisë së lartë, siç ka thënë vazhdimisht Putin”, tha Sergei Lavrov.
Lavrov tha se shpresonte se doktrina e re bërthamore e Moskës, në të cilën Vladimir Putin uli pragun për një sulm bërthamor, do të lexohej me vëmendje. Ai shtoi se vendimi i Gjermanisë për të mos ofruar raketa me rreze të gjatë veprimi për Ukrainën deri më tani ishte “një pozicion i përgjegjshëm”.
Lavrov tha gjithashtu se Rusia do të bëjë gjithçka që është e mundur për të parandaluar shpërthimin e luftës bërthamore.
