Forcat ruse ditën e djeshme kanë pësuar një disfatë të thellë në Kherson dhe kjo gjë mund të sjellë një kundërsulm të ashpër prej tyre, aq sa mund të përdorin armë bërthamore, ka paralajmëruar një ekspert britanik. Sulmet ajrore nga ukrainasit kanë shkatërruar disa ura duke iu ndërprerë mundësinë trupave ruse të depërtojnë në brendi të qytetit.
Ndërsa doktrina ushtarake ruse përshkruan armët taktike bërthamore kur forcat e saj po përballen me disfatë, shqetësimet po rriten se Vladimir Putin-i mund t’i përdorë ato. Kësisoj, eksperti i armëve kimike, koloneli Hamish de Bretton-Gordon ka bërë me dije se: “Fantazma e Rusisë duke përdorur armë bërthamore taktike në Ukrainë është pa dyshim një shqetësim në rritje në kryeqytetet e NATO-s”.
“Ndërsa batica duket se po kthehet në Ukrainën e jugut, operacioni special i Putin-it mund të jetë gati për t’u zbërthyer. Në këtë fazë është kritike që Britania e Madhe dhe SHBA-ja t’i sinjalizojnë Kremlinit se çdo përdorim i armëve bërthamore do të kalonte vijën e kuqe”.
Raketat bërthamore taktike zakonisht kanë një rreze vrasëse prej një milje e gjysmë. Por valët e tyre goditëse dhe pulset elektromagnetike shtrihen më tej, duke paraqitur një rrezik shtesë për jetën. Agjencitë perëndimore të inteligjencës sinjalizuan se po monitoronin nga afër çdo tranzit të këtyre armëve drejt Ukrainës jugore.
Kjo frikë u shfaq pasi numri i trupave ruse të vrarë ose të plagosur në konflikt u vlerësua në 75,000 ose më shumë. Vlerësimi i fundit i SHBA-së ishte rritur nga 60,000 të paraqitura javën e kaluar.
Ditët e fundit ka pasur gjithashtu një rënie të konsiderueshme të sasive të municioneve ruse që janë gjuajtur në pozicionet ukrainase. Zjarri i artilerisë ruse është përgjysmuar, me shumë mundësi për shkak të shkatërrimit të depove të raketave shumë prapa vijës së frontit, shkruan Daily Mail.
