Ukraina deklaroi të mërkurën se ka sulmuar objektiva detarë dhe infrastrukturën portuale në Krime, në një prej sulmeve më të mëdha kundër flotës dhe marinës ruse në Detin e Zi.
Rusia më herët pretendoi se Ukraina kishte lëshuar 10 raketa dhe tre anije pa pilot gjatë sulmit, i cili shkaktoi një zjarr të madh në një kantier detar të Sevastopolit, duke lënë 24 persona të plagosur.
Guvernatori i instaluar nga Moska pretendoi se shumica e raketave u rrëzuan, por dy anije u dëmtuan nga sulmi. Ukraina ka lënë të kuptohet se sulmi është kryer me raketa të furnizuara nga Perëndimi.
Anijet pa pilot, të njohura me emra të ndryshëm, duke përfshirë dronët e detit dhe varkat-dron, operojnë mbi ose nën ujë. Ato zakonisht kanë eksplozivë të integruar dhe kamera që çojnë pamje drejtpërdrejt te personi që i kontrollon.
Një foto e shpërndarë nga Guvernatori i Sevastopolit, Mikhail Razvozhayev në Telegram tregon flakët që duket se janë në një anije në port. “Mendohet se ajo është një zonë ku riparohen anijet,” shkruan BBC.
Thuhet se një anije e madhe zbarkuese e quajtur Minsk dhe një nëndetëse e quajtur Rostov-mbi-Don – që të dyja në dok të thatë, janë dëmtuar. Kjo e bën atë një nga sulmet më të rëndësishme të Ukrainës deri më tani kundër flotës së Detit të Zi.
Sipas agjencisë shtetërore të lajmeve Ria Novosti, ministria ruse e Mbrojtjes tha se të dy anijet do të riparohen plotësisht dhe do të vazhdojnë në shërbimin normal.
Një zyrtar i inteligjencës ushtarake ukrainase Andriy Yusov tha për Reuters: “Ne konfirmojmë se një anije e madhe zbarkuese dhe një nëndetëse u goditën. Ne nuk komentojmë mbi mjetet (e përdorura) për sulmin.”
