Universiteti i Miçiganit ka rënë dakord të paguajë 490 milionë dollarë si dëmshpërblim për më shumë se 1,000 ish-studentë kryesisht meshkuj, të cilët thonë se janë abuzuar seksualisht nga mjeku sportiv, Robert Anderson.
Avokatët njoftuan zgjidhjen pas 15 muajsh negociata mbi akuzat që datojnë në vitet 1960.
Njëri tha se mendonte se zgjidhja do të sillte “drejtësi dhe shërim”.
Anderson, i cili vdiq në vitin 2008, thuhet se ka abuzuar me viktimat gjatë ekzaminimeve rutinore mjekësore.
Një hetim policor i nisur në vitin 2018 tha se nuk mund të ngrihej asnjë akuzë sepse Anderson kishte vdekur dhe asnjë nga krimet e tij të supozuara nuk binte brenda statutit të kufizimeve gjashtëvjeçare të shtetit.
Mirëpo, në vitin 2020, presidenti i Universitetit të Miçiganit, Mark Schlissel, i kërkoi falje në emër të universitetit kujtdo që ishte dëmtuar nga mjeku.
Vitin e kaluar, një raport i pavarur i porositur nga universiteti zbuloi se gjatë karrierës së Anderson atje, nga viti 1966 deri në vitin 2003, stafi kishte humbur shumë mundësi për ta ndaluar atë.
Sipas marrëveshjes, rreth 1,050 njerëz do të marrin një pjesë të 490 milion dollarëve, me 30 milion dollarë të lënë mënjanë për çdo akuzues të ardhshëm.
“Ka qenë një rrugëtim i gjatë dhe sfidues dhe unë besoj se kjo zgjidhje do të sigurojë drejtësi dhe shërim për shumë burra dhe gra të guximshme që refuzuan të heshtin”, ka thënë avokati i viktimave, Parker Stinar.
Shumë nga akuzat kundër Anderson përfshinin ekzaminime të panevojshme të rektumit dhe testikujve.
Në vitin 2018, një kolegj tjetër në shtet, Universiteti Shtetëror i Miçiganit, ra dakord të paguante 500 milionë dollarë në një zgjidhje me qindra gra të dhunuara nga mjeku i gjimnastikës Larry Nassar, i cili është në burg për krimet e tij.
