Universiteti i Tiranës ka nderuar me titullin “Doctor Honoris Causa” Federica Mogherinin, ish përfaqësuesen e BE për Politikën e Jashtme. Në ceremoninë e organizuar nga Universiteti i Tiranës, një fjalë përshëndetëse e mbajti edhe kryeministri Edi Rama.
Duke e cilësuar një mike të mirë të Shqipërisë dhe të tijën personale, Rama ka shprehur mirënjohjen për gjithçka që Mogherinin ka bërë për integrimin e vendit në BE dhe stabilitetin rajonal.
“Universiteti ka bërë një gjest kuptimplotë edhe të lavdërueshëm duke i dhënë Federikës këtë titull dhe duke e përfshirë në radhën e atyre emrave që rektori citoi dhe të cilët sigurisht janë personalitete shumë të spikatur botërisht.
Nëse do të bëja një veçim të Federikës nga ajo radhë, do ta bëja duke pasur parasysh angazhimin e saj personal dhe të vazhdueshëm në mbështetje të Shqipërisë, në mbështetje të përpjekjeve tona për të ecur më shpejt në rrugën e integrimit europian, në mbështetje të nevojës tonë për të pasur zërat që na ndihmonin dhe na ndihmojnë për argumentet tona, në raport me atë që është një gjykatë e përditshme e punës dhe rezultateve, flas për Brukselin, dhe padiskutim edhe për angazhim e jashtëzakonshëm të saj në funksion të paqes, në funksion të normalizimit dhe të rritjes së bashkëpunimit në rajon”, tha Rama.
Kryeministri Edi Rama dha gjithashtu lajmin se Kolegji i Europës do të ketë kampusin e saj në Tiranë, ku Federica Mogherinin është rektore e këtij kolegji.
“Dua t’i shpreh Federikas edhe këtu mirënjohjen për gjithçka ajo ka bërë për Shqipërinë, për shqiptarët edhe për rajonin dhe dua të shpreh publikisht kënaqësinë e madhe që Federika do të vijë më shpesh në Shqipëri, tanimë si drejtore e Kolegjit të Europës sepse faktikisht ne kemi nisur punën për Kolegjin e Europës në Tiranë që do të jetë pjesa e tretë e Kolegjit të Europës që qendrën e ka në Bruzh (Bruges), një krah e ka në Poloni dhe krahun tjetër do ta ketë në Shqipëri.
Është diçka vërtet e jashtëzakonshme për ne. Diçka që do të ishte shumë e vështirë ta imagjinonim vetëm deri disa vite më parë që Shqipëria do të bëhej vendi i Kolegjit të Europës dhe patjetër që edhe për këtë një falënderim i veçantë i takon Federikas, e cila ka qenë mbështetëse pa rezervë e kësaj ideje”, tha Rama.
Federica Mogherini është Rektore e Kolegjit të Evropës që nga shtatori 2020. Kolegji i Evropës është një institut pasuniversitar i studimeve evropiane me kampusin e tij kryesor në Bruges, Belgjikë dhe një kampus të dytë në Varshavë, Poloni.
