Në urën e Kurçajt në Krujë po vazhdojnë punimet restauruese për t’u kthyer në arsyen kryesore të rigjallërimit të zonës rreth saj.
Delegacioni i Bashkimit Evropian në Tiranë bën të ditur se ky sit i rëndësishëm i trashëgimisë kulturore po rimerr formën e tij falë programit EU4 Culture.
“Ura e Kurçajt së shpejti do të mund të përdoret nga banorët e zonës dhe vizitohet nga turistët, duke u kthyer në arsyen kryesore të rigjallërimit të zonës rreth saj. Ne besojmë se ky sit i trashëgimisë kulturore i ndërtuar shekuj më parë, do të kthehet në arsyen kryesore të rivitalizimit të zonës rreth tij”, shprehet Delegacioni i BE-së.
Ura e Kurçajt ndërtim i shekullit XVIII, ndodhet në hyrje të fshatit Kurçaj të komunës së Niklës, nga ana e Krujës, mbi lumin e Zezës, që buron nga Qafështama.
Ura e Kurçajt i shërbente rrugës së shkurtër të karvanëve Tiranë-Krujë, sipas këtij itinerari: Tiranë-Zall Herr-Rradhesh-Mukaj-Buronjë-Kurçaj-Barkanesh-Krujë.
Në thembrat e qemerit të madh ruhen vrimat e trarëve të poshtëm të armaturës së harkut.
Në faqet ballore është e punuar me gurë pllakë të zinj, vendosur shtrirë, ndërsa kalldrëmi është i bërë me breza, tip shkallësh.
Këta breza ngrihen mbi bazën e kalldrëmit rreth 10-15 cm dhe shtriheshin çdo 100-120 cm./ATSH/
