Pas ngjarjes së rëndë, ku një vajzë tre vjeçare përfundoi në spital me këmbë të thyer, pas dhunës së ushtruar, në kopshtin “Stinet”, qytetarët janë mbledhur në protestës para ambienteve të institucionet privat.
Prindër të fëmijëve, kanë protestuar duke kërkuar zbardhjen e rastit dhe duke u shprehur se duhet të merren masa të rrepta ndaj edukatoreve dhunuese, që të shërbejnë si shembull për mos përsëritje të rasteve.
“Për këdo fëmijë, është rast shokues. Fëmijën tim e çoj në kopsht shtetëror fëmijën tim, të ky kopsht ka pasur denoncime dhe më parë. Kopshtet duhet të monitorohen me kamera që shihet gjithçka çfarë ndodh. Duhet të bëhen kontrolle në kopshte dhe duhet të merren masa më të rrepta. Nuk dihet se çfarë do të bëja nëse diçka do t’u ndodhte fëmijëve të mi”, tha një nënë.
Ndërsa një tjetër u shpreh: “Po të isha në vendin e prindërve, do reagoja shumë keq. Është diçka që nuk tolerohet. Ka njerëz që i rrisin në vështirësi. Kam dëgjuar dhe më parë raste dhune në kopshte, u bëjnë shantazhe e presione psikologjike. Fëmijët e mi janë në kopsht shtetëror.”
Për rastin në fjalë, policia ka shoqëruar edukatoren Majlinda Dehima në komisariat, rreth 6 ditë pas ngjarjes, ku e mitura u dhunua dhe më pas u shtrua tek Trauma për shkak të thyerjes së këmbës.
Ende nuk dihen rrethanat se si vogëlushja ka thyer këmbën, Prokuroria dhe Policia po punojnë për zbardhjen e rastit.
Siç shihet në videon e sihguruar nga Panorama, vogëlushja, e cila ka përfunduar në spital me këmbë të thyer, qëndron e ulur në karrige së bashku në dhomën e vizatimit ku ndodhen edhe disa fëmijë të tjerë.
Në pamje edukatorja shfaqet me një vizatore në dorë dhe godet disa herë karrigen ku ndodhet e ulur 3-vjeçarja, e cila kthen kokën në drejtim të saj.
