Vajza e një tjetër aleati të Vladimir Putin raportohet të jetë gjetur e vdekur në rrethana misterioze, në një lagje të kryeqytetit rus.
44-vjeçarja Natalia Bochkareva vdiq pasi u raportua se nuk ndihej mirë një ditë më parë në banesën e saj në lagjen Presnensky të Moskës.
Ajo u gjet në banesën nga një korrier, i cili thirri policinë për të raportuar se ajo nuk po i përgjigjej, teksa ai i kishte trokitur disa herë në derë.
Oficerët shkuan në pronën në distriktin e pasur të Presnensky më 11 korrik, hapën me forcë derën e përparme dhe brenda gjetën trupin e pajetë të saj.
Sipas të dhënave paraprake nuk ka pasur shenja të vdekjes së dhunshme, por dyshohet se Natalia vuante nga problemet në zemër.
Natalia është vajza e ish-guvernatorit rajonal, të ndjerit Vasily Bochkarev. Ai drejtoi rajonin e Penzës nga 1998 deri në 2015.
Një vit pas largimit nga detyra, 67-vjeçari, i cili i përkiste partisë “Rusia e Bashkuar” e Vladimir Putinit, ndërroi jetë nga kanceri në mushkëri.
Pas vdekjes së të atit, Natalia mori në menaxhim bizneset familjare, që janë aktivitete në përpunimin e lëndës drusore.
Natalia pushtoi titujt kryesorë të mediave dy vite më parë pasi ra viktimë e një mashtrimi. Gjatë dy muajve, ajo i kishte dërguar një fallxhoreje të vetëshpallur, 136,000 paund për të hequr një mallkim.
Megjithatë, pas marrjes së parave, fallxhorja kishte ndërprerë çdo kontakt me Natalia dhe nuk arriti të përmbushte pjesën e saj të marrëveshjes.
Kjo është vdekja e disatë në radhët e elitës ruse të lidhur me kreun e Kremlinit. Vetëm javën e kaluar, një tjetër aleat i Putinit vdiq papritur për shkaqe të pashpjegueshme.
