Shpresoj që vendet anëtare të BE-së do të marrin një vendim pozitiv përpara samitit BE-Ballkani Perëndimor në Zagreb, në maj, deklaroi sot komisioneri për Zgjerimin, Oliver Varhelyi.
Pas paraqitjes së raportit nga komisioneri për Fqinjësi dhe Zgjerim Oliver Varhelyi, ky i fundit tha se ”pas miratimit në shkurt të metodologjisë së rishikuar për procesin e pranimit, ne sot po prezantojmë përditësimet tona për Shqipërinë dhe Maqedoninë e Veriut”.
”Ato tregojnë se këto vende kanë arritur rezultate të mëtejshme të prekshme dhe të qëndrueshme në fushat kryesore të identifikuara në Konkluzionet e Këshillit të qershorit 2018”, shtoi ai.
”Komisioni i mbështet fort rekomandimet e tij për të hapur negociatat e pranimit me Shqipërinë dhe Maqedoninë e Veriut dhe unë shpresoj që shtetet anëtare do të marrin një vendim pozitiv përpara samitit Bashkimi Europian-Ballkani Perëndimor në Zagreb, në maj”, theksoi Varhelyi.
