“Është një ditë shumë e bukur këtu. Është kënaqësi të ngjitesh për të shijuar këtë panoramë të Vlorës dhe një ditë ku komisioneri do na thotë diçka më shumë për atë që ne presim që është fillimi i negociatave formale me BE-në”. Kështu u shpreh kryeministri Edi Rama në konferencën e përbashkët për shtyp me komisionerin për Zgjerimin në BE Oliver Varhelyi, pas inspektimit të By-pass-it të Vlorës të financuar nga Bashkimi Europian.
Në fjalën e tij kreu i qeverisë shqiptare, theksoi se Shqipëria nuk ka se çfarë të bëjë më shumë, veçse të presë dritën jeshile për këtë proces një orë e më parë.
“Unë nuk dua të zgjatem me këtë pikë. Gjërat i kemi thënë, aktualisht parlamenti i RMV është mbledhur me gjasë për të miratuar në fund të një debati tejet të politizuar dhe padrejtësisht atë që quhet propozimi i fundit francez, ndërkohë që sa i takon Shqipërisë nuk ka ç’të bëjë më shumë sesa të presë dhe të shohim dritën jeshile të ndezur një orë e më parë. Do të përsërisim të njëjtën gjë që pavarësisht aspektit formal të procesit ne do të vazhdojmë njësoj sikur negociatat duhet të ishin hapur me reformat investimet e garantuara”.
Sa i takon by-pass-it të Vlorës, Rama tha se ky është një segment kyç për lehtësimin e trafikut, por edhe redukton ndotjen e ajrit.
“Ky është segment kyç për vendin, pasi rruga kombëtare kalonte përmes qytetit të Vlorës ku trafiku në qytet vështirësohej shumë gjatë t të verës. Tani me by pass-in lehtëson trafikun por edhe reduktimin e ndotjes së ajrit. Kemi edhe disa xhepa ku qytetarët mund të ndalojnë e bëjnë fotografi. Ky është një aks tërësisht i ri rrugor. Është dashur të hapet mali”.
Ndërsa Ministrja e Energjisë dhe Infrastrukturës Belinda Balluku u shpreh se është në bisedime për by pass-in e Tiranës i cili do të lidhë veriun, jugun dhe qendrën e Shqipërisë.
“Gjëja e parë me të cilën jemi marrë kanë qenë shpronësimet, janë bërë shumë punime. Po bëhen punime dhe që pjesa e zhveshur e malit të jetë e gjelbër, së pari duke e mbrojtur me rrjetë mbrojtëse. E gjitha kjo ka qenë thjesht mal. Ky është një projekt që mbështetet nga BERZH dhe BE ka dhënë grant të plotë prej 20 mln eurosh. Kemi bërë biseda edhe për by pass-in e Tiranës se do lidhë të gjitha autostratadat që do të vijnë nga veriu nga jugu dhe qendra e Shqipërisë dhe tjetra është për hekurudhën nga Vora në Han të Hotit dhe kemi filluar mbështetjen për këtë projekt”.
Komisioneri i BE-së për Fqinjësinë dhe Zgjerimin Oliver Várhelyi, ka vizituar këtë të enjte Shqipërinë. Së bashku me kryeministrin Edi Rama kanë vizituar bypass-in Vlorës, i cili është financuar nga BE-ja.
