Epidemiologu Ilir Alimehmeti, ka komentuar variantin “Delta” , i cili është përhapur në shumë vende të botës.
I ftuar në emisionin “Ditë e Re” në RTV Ora, Alimehmeti, shprehet se për personat që e kanë kaluar Covid-19, risku për t’u infektuar me variantin “Delta” është shumë i ulët, teksa shton se ky variant nuk lë pasoja mbrapa.
Më tej shton se personat që nuk e kanë kaluar Covid-19, duhet që të vaksinohen, në mënyrë që të jenë të mbrojtur nga varianti që ka një transmetueshmëri 40% më të lartë se varianti britanik.
“Do zhduket shumë shpejt emërtimi Delta. Po ta shohim të gjithë variantet e Covid-19, kanë të njëjtat mutacione dhe diskutimi është kombinimi I tyre. Ky quhet fenomeni homoplazik, homoplazia janë mutacione konvergente. Ndryshe nga Sars, kjo ka vdekshmëri shumë të ulët, dhe kjo ka ardhur duke rënë me kalimin e kohës, por transmetueshmëria ka qenë shumë e lartë. Kur flasim për risk relativ ky risk ka filluar duke rënë. Kur flasim për risk absolute, sepse 2% 2000 personave i bie 20 njerëz, por 0,3% e 1 milionë vetëve i bie shumë më tepër. Prandaj duhet t’i marrim parasysh të dyja. Risku personal shihet te relativi.
Sipas një studimi variant Delta është 40% më i transmetueshëm, por nga krahu tjetër simptomat janë shumë më të lehta dhe deri diku ndryshe nga variantet e tjera. Varianti britanik ishte në qarkullim kur nuk ishte vaksina, ishte në qarkullim kur numri i personave që e kishte kaluar ishte më o vogël. Ka disa elemente që ne duhet t’i shohim më me kujdes. Varianti Delta nuk ka risk ekstra për personat që e kanë kaluar më parë. Pasojat nga varianti Delta janë shumë të rralla. Personat që nuk e kanë kaluar koronavirusin, duhet të vaksinohen. Mbrojtja nga një dozë vaksine nuk është se nuk ekziston, por është shumë e ulët, në krahasim me atë çka dëshirojmë, por mos të harrojmë që mbrojtja është më e madhe me dy doza. Pra rruga është vaksinimi.”
I pyetur në lidhje me lajmet që kanë qarkulluar se një person duhet të marrë 3 doza vaksinash, mjeku u shpreh se kjo ka dalë nga kompanitë farmaceutike, teksa shton se për këtë nuk ka asnjë studim.
“Kjo doli nga kompanitë farmaceutike që prodhojnë vaksinat. Izraeli ka përdorur masivisht Pfizer, dhe tha që na ka shkuar në 67% efektiviteti i Pfizer, por për infektimet dhe jo për format e rënda dhe për vdekshmërinë. Dhe si rrjedhim ata janë duke menduar për dozën e tretë, pra është i pari shtet që ecën me këtë ide, nuk kemi asnjë shtet tjetër dhe një studim tjetër që na e ka thënë këtë.
Kjo duhet studiuar kokë më kokë për çdo vaksinë dhe çdo popullatë, sepse kemi popullata që e kanë kaluar në nivele shumë të larta. Duhet ta vlerësojmë nëse në Shqipëri do të ketë një dozë të tretë. Duhet të kemi të dhëna, dhe deri më tani nuk kemi asgjë. Lockdown, shkojnë shtetet që dështojnë në procesin e vaksinimit. Lockdown është rruga që kanë shtetet që kanë mbetur mbrapa me vaksinimin.”
