Një turist britanik ka vdekur, ndërsa partnerja e tij është në gjendje kritike pasi ranë nga një motor uji në Shqipëri.
34-vjeçari u konfirmua i vdekur nga rojet bregdetare, të cilët besojnë se ai humbi kontrollin e motorit të ujit dhe ra në det, shkruan Daily Mail.
Çifti, pushues në Shqipëri po bënin ‘manovra’ pranë zonës së Shkëmbit të Kavajës në Durrës, kur ranë në ujë dje në mëngjes, u raportua në mediat lokale.
Një hetim ka nisur për të zbardhur rrethanat e aksidentit tragjik.
Çifti ende nuk është identifikuar publikisht, por policia i ka dhënë inicialet e tyre – burri ishte S.O dhe gruaja ishte V.B.
Policia tha: ‘Rreth orës 11:15, më 01.06.2025, shërbimet e Policisë Kufitare të Portit të Durrësit u njoftuan se, në zonën përballë Shkëmbit të Kavajës, dy shtetas që po lundronin me një motor uji, dyshohet se kanë humbur kontrollin e mjetit lundrues gjatë manovrave dhe kanë rënë në ujë.
Shërbimet e Policisë Kufitare, pasi morën njoftimin, shkuan menjëherë me mjete lundruese për të ndihmuar dy shtetasit që kishin rënë në ujë, duke i transportuar ata në port, me qëllim transportimin e tyre në spital.
Nga verifikimet paraprake të kryera nga ekipi i urgjencës së spitalit, i cili po priste në port, rezultoi se njëri prej shtetasve që lundronte me mjetin Jet Ski, konkretisht shtetasi S.O, 34 vjeç, banues në Angli, kishte humbur jetën, ndërsa shtetasja V.B, 31 vjeçe, banues në Angli, u transportua menjëherë në spital në gjendje të rëndë.
Një grup i posaçëm hetimor u krijua menjëherë dhe, nën drejtimin e Prokurorisë, puna vazhdon për të sqaruar rrethanat dhe për të dokumentuar ligjërisht çështjen.
Megjithatë, disa media kishin raportuar në atë kohë se dyshja u zbuluan ‘gjatë një patrullimi të rastësishëm’, me motorin e automjetit të fikur.
Ata shtuan se ishte e mundur që çifti të vuanin nga hipotermia, pasi kishin qenë në det për disa orë, sipas informacionit nga porti.
Incidenti i tmerrshëm vjen vetëm disa javë, pasi një turist tjetër britanik u përfshi në telashe me një jet ski, ndërsa ndodhej në Tajlandë.
Mashtrimet me motorët e ujit janë bërë një burim famëkeq fitimi për vendasit, me kompanitë e qirasë që punojnë në bashkëpunim me disa policë me sa duket të korruptuar për të zhvatur shuma të mëdha parash nga pushuesit për dëmtime inekzistente të motorëve të ujit./ Daily Mail.
