Ministrja e Mjedisit, Mirela Kumbaro reagoi edhe njëherë në lidhje me ngjarjen e rëndë në plazhin e Potamit, ku 7-vjeçarja Jonada Avdija humbi jetën duke u larë në det pasi u godit nga një skaf që drejtohej nga ish-efektivi i policisë Arjan Tase.
Kumbaro tha për Deutsche Welle se ngjarja erdhi pasi një person i papërgjegjshëm theu çdo ligj dhe rregull dhe për këtë arsye kërkoi dënim maksimal për të.
“Kemi të bëjmë me një ngjarje ku një person krejt i papërgjegjshëm ka thyer çdo ligj dhe rregull duke tejkaluar kordonin e sigurisë dhe bërë manovra të rrezikshme, i cili meriton ndëshkim maksimal”, u shpreh ministrja Kumbaro.
Më tej, ministrja shton se po përgatitet paketa e re e rregullave për aktivitetet turistike detare.
“Ne po bëjmë gati paketën e rregullave të reja për normimin dhe bashkërendimin e aktiviteteve turistike detare. Kemi kërkuar nga Policia e Shtetit dhe Policia Kufitare monitorim të rreptë të hapësirës ujore në plazhe si edhe ndëshkime maksimale për kundravajtësit”, shton ministrja Kumbaro.
