Sot në orët e hershme të mëngjesit ka vdekur nga një sulm në zemër nëna e dëshmorit Ymer Alushani nga fshati Komoran i komunës së Drenasit, e menjëherë pas saj edhe djali, vëllai i Ymerit.
Lajmin e ka bërë publik nëpërmjet rrjetit social njëri nga familjarët e dëshmorit.
“Me pikëllim të thellë iu njoftoj se sot në orët e hershme të mëngjesit ndërroi jetë nga një sulm në zemër Miradia, së bashku me djalin Luan Alushani. Nëna dhe vëllai i dëshmorit Ymer Alushani”, shkruan një familjar.
Sipas informatave të Kosovapress, Luani ka vdekur posa ka kuptuar për vdekjen e nënës.
Varrimi bëhet sot në orën 15:00, në varrezat e lagjes Alushani.
Familjarët i ka ngushëlluar edhe presidenti Hashim Thaçi.
“Me pikëllim mora lajmin për vdekjen e nënës së Heroit të Kosovës Ymer Alushani, Miradije Alushani dhe djalit të saj, Luanit. Familjes Alushani i shpreh ngushëllimet më të thella për këtë humbje të dyfishtë”, shkruan Thaçi.
Familjarët më pas i ka ngushëlluar edhe kryetari i OVL-UÇK-së, Hysni Gucati.
Më vonë, ka ngushëlluar edhe kryeministri në largim Ramush Haradinaj.
