Kandidati i Partisë Socialiste, Erion Veliaj ka falenderuar votuesit pas konfirmimit për një mandat të dytë në krye të bashkisë së Tiranës. Duke falenderuar kandidatin e Bindjes Demokratike, Arben Skënderajn, Veliaj thekson se është koha për t’i përveshur sërish mëngët për më shumë punë e vëllazëri, përtej ndasive.
“Tirana u kry! Mirënjohje e përulësi për secilin prej jush! Respekt për Arben Skënderin e gjithë bekimet e botës për familjen e tij! Mezi pres edhe skuadrën e Këshillit Bashkiak, ku përveç PS do të ketë edhe disa parti të tjera, që të nisim me vendimet jetike aty! Gara mbaroi! Tani le të përveshim mëngët për më shumë punë e vëllazëri, përtej ndasive, siç i ka hije Tiranës që duam! Ka më shumë gjëra që na bëjnë bashkë, se ato që na ndajnë. Unë do jap më të mirën për Tiranën, të ftoj edhe ty të japësh sa mundesh! Të falenderoj e përqafoj! Forca! #BASHKË”, shkruan Veliaj.
Erion Veliaj u shpall fitues me 152,230 vota, ndërsa Arben Skënderaj mori vetëm 9,364 vota.
