Deputetja e Partisë Socialiste, Mimi Kodheli, deklaroi sot se “Shqipëria duhet të jetë e fokusuar në detyrat e shtëpisë të lëna nga Bundestagu gjerman. Ka 2-3 pika të rëndësishme që duhet të përmbushen para hapjes së negociatave dhe të tjera që duhet të përmbushen pas hapjes së negociatave”.
Në një studio televizive, Kodheli tha se “kushtet janë të lidhura me njëra tjetrën, sepse nëse thuhet se duhet të formatohet tërësisht Gjykata Kushtetuese dhe Gjykata e Lartë, kjo lidhet me faktin që ata që nuk kanë kaluar Vetingun gjykatës apo prokurorë, duhet të tejçohet me tej procesi dhe të mos lihen vetëm me moskalim Vetingu, por edhe të gjykohen”.
“Gjërat janë të lidhura pikat e fundit në listimin e 9 kërkesave janë absolutisht vazhdim thellim i reformave tashmë të nisura, nuk duhet të kishim asnjë çudi dhe koment politik negativ lidhur me një gjë që ne jemi më interesuar se kushdo që të bëhet”, – tha Kodheli.
Sipas saj, këto nuk janë kushte shtesë thellimi dhe zgjerimi i reformës ku ne kemi hyrë tashmë.
“Reformat nuk duhet vetëm të ceken ato duhet të thellohen, sepse mund te ndodhe që të kemi edhe eksperienca negative”, – tha Kodheli.
Duke folur për Maqedoninë e Veriut, Kodheli theksoi se “ajo e plotësoi çështjen e emrit, por do ti kërkohen më tej të gjitha thellimet e reformave që i kërkohen Shqipërisë, sepse të tilla i kërkohen edhe Rumanisë, Bullgarisë edhe Italisë, që është një vend themelues i BE-së kur të lidhet me deficitin buxhetor, sepse BE me të gjitha strukturat e mekanizmat e veta është një trup i gjallë”.
Kodheli u shpreh se “e kam ndjekur me vëmendje debatin politik mbrëmë në Bundestag, ku ka pasur parlamentarë gjermanë që kanë qenë absolutisht pro dhe në favor pa kushte fare, ashtu siç ka pasur të tjerë që kanë qenë skeptikë”.
Lidhur me zgjedhjet e qershorit, Kodheli tha se “me sa jam informuar Gjykata Kushtetuese do të jetë e formuar deri në fund të tetorit dhe do pritet një gjykim i saj për zgjedhjet. Këto zgjedhje kanë qenë të rregullta, korrekte, fakti që sot ka një tryezë për diskutimin e kodit zgjedhor, tregon që zotërinjtë kanë reflektuar”.
Ajo e konsideroi një gafë të madhe largimin e opozitës nga parlamenti dhe mosmarrjen pjesë të tyre në zgjedhje./ATSH/
