Aktori legjendar i “Die Hard”, Bruce Willis, po jeton aktualisht nën kujdes të përhershëm, larg familjes së tij, si pasojë e përkeqësimit të sëmundjes së demencës frontotemporale.
Lajmin e bëri të ditur bashkëshortja e tij, Emma Heming Willis, në një intervistë prekëse për programin special të ABC-së, Emma & Bruce Willis: The Unexpected Journey.
Emma, e cila ka dy vajza me aktorin – Mabel, 13 vjeçe dhe Evelyn, 11 – tha se vendimi për ta sistemuar Bruce-in në një shtëpi me kujdes 24 orë ishte “një nga më të vështirët” që ka marrë ndonjëherë.
“E dija që, para së gjithash, Bruce do ta dëshironte këtë për vajzat tona. Do të donte që ato të jetonin në një shtëpi të përshtatur për nevojat e tyre, jo për të tijat,” – tha ajo.
Megjithëse nuk jetojnë më nën të njëjtën çati, Emma theksoi se janë “shumë shpesh atje” dhe se e konsiderojnë atë shtëpi si “shtëpinë e dytë”.
“Është një shtëpi e mbushur me dashuri, ngrohtësi dhe të qeshura. Është e mrekullueshme të shohësh sa shumë nga miqtë e Bruce-it vazhdojnë të vijnë për ta vizituar – sjellin jetë dhe gëzim,” tregoi ajo.
Ish-bashkëshortja e Bruce-it, Demi Moore, dhe vajzat e tyre – Rumer, 36, Scout, 33, dhe Tallulah, 31 – gjithashtu e vizitojnë aktorin rregullisht, duke ruajtur lidhjen familjare në këtë periudhë të vështirë.
Emma, 49 vjeçe, rrëfeu se diagnoza e Bruce-it ka qenë një përvojë e rëndë dhe shpeshherë e vetmuar. Ajo foli për ankthin dhe shqetësimet që ka përballuar, duke përmendur nevojën për t’u kujdesur për çdo detaj të sigurisë në shtëpi për shkak të sjelljeve që lidhen me demencën.
“Pacientët me FTD mund të ndihen të shqetësuar nga zhurmat e forta, prandaj ndalova së organizuari ‘playdate’ apo fjetje me shoqe për vajzat. Jo vetëm që isha e izoluar, por izolova gjithë familjen tonë – vajzat gjithashtu. Dhe kjo ishte e qëllimshme. Ishte një kohë e vështirë, shumë e vështirë,” tha ajo.
Pavarësisht vështirësive, Emma po merr trajtim për depresionin dhe është mirënjohëse për momentet e vogla me Bruce-in, duke thënë se lidhja emocionale ende ekziston.
“Kur jemi me të, ai ndriçon. Na mban për dore, na përqafon, na puth. Ai e ndien praninë tonë dhe reagon. Kjo është gjithçka që më nevojitet,” tha ajo.
“Nuk më duhet të më njohë si bashkëshorten e tij, nuk ka rëndësi data e martesës. Thjesht dua të ndiej që kemi ende një lidhje – dhe e kemi.”
Bruce Willis u tërhoq nga aktrimi në vitin 2022 pas diagnozës me afazi, e cila më vonë u konfirmua si demencë frontotemporale. Roli i tij i fundit ishte në filmin aksion-shkencor Assassin, i publikuar në mars 2023.