Ekspertët konfirmuan sot autenticitetin e një autoportreti të Vincent van Gogh, ku ai paraqet një pamje të trishtuar, duke i dhënë fund kështu dekadave të tëra me paqartësi rreth pikturës së konsideruar prej tyre si e vetmja vepër e realizuar nga artisti holandez gjatë periudhës kur ky vuante nga psikoza.
Në pikturën e titulluar “Autoportret” (1889), artisti i torturuar është vetëpërfaqësuar me kokën të përkulur poshtë, vështrimin bosh, një shprehi trishtimi në fytyrën e mbyllur dhe e gjithë kjo me ngjyrime të zbehta.
Pas analizës shkencore me rreze X, studimit të shiritave dhe referencave për pikturën të gjendur në letrat e piktorit drejtuar vëllait të tij, Theo, ekspertët vërtetuan se kanavaca ishin pikturuar në fund të verës 1889, kohë kur Van Gogh po qëndronte në një azil psikiatrik në Saint-Rémy-de-Provence, në jug të Francës.
Piktura është realizuar me ngjyra më të zbehta se pikturat e po të njëjtës periudhë dhe një pjesë e saj duket e papërfunduar./ATSH/
