Ish-kryeministri i Italisë, Matteo Renzi ka reaguar lidhur me marrëveshjen Shqipëri-Itali për emigrantët e kapur në brigjet italiane dhe transferimin e tyre drej kampeve të Gjadërit dhe Shëngjinit.
Teksa po komentonte zhvillimet e fundit lidhur me marrëveshjen, Renzi përmendi edhe arrestimin e ish-presidentit, Ilir Meta.
“Ne e dimë që pak më herët u arrestua ish-presidenti shqiptar. Nga pamjet e arrestimit që kapet dhe tërhiqet zvarrë në mes të rrugës një ish-president, imagjinoje çfarë mund të bëjnë autoritetet shqiptare me emigrantët bangladeshas”, thotë ai.
Ish-presidenti Ilir Meta u arrestua ditën e djeshme me urdhër të SPAK në zonën e “Casa Italia” në Tiranë. Në njoftimin e SPAK thuhet se objekti i hetimit të këtij procedimi janë veprimet korruptive të zyrtarëve të shtetit në lidhjen dhe zbatimin e kontratës së shërbimit CEZ-DIA. SPAK thotë se janë dokumentuar disa episode ku subjektet e këtij procedimi penal Ilir Meta dhe Monika Kryemadhi në bashkëpunim mes tyre, por edhe me funksionarë të tjerë publikë janë përfshirë në kryerjen e disa veprave penale. Në njoftimin e SPAK thuhet se është provuar se ish-Ministri i Ekonomisë, Tregtisë dhe Energjitikës, Ilir Meta, ka përdorur autoritetin dhe influencën e tij për të ndërhyrë në procesin e lidhjes së kontratës ndërmjet shoqërisë “Debt International Advisory” dhe kompanisë CEZ Shpërndarje. SPAK thotë se kjo kontratë kishte për objekt asistimin në identifikimin dhe arkëtimin e borxheve të prapambetura.
