Një incident i frikshëm ka ndodhur në një fluturim të kompanisë easyJet nga Luton drejt Glasgow-t, mëngjesin e së dielës, kur një pasagjer 41-vjeçar u ngrit në këmbë dhe nisi të bërtasë se kishte një bombë në bord.
Ngjarja ka ndodhur rreth orës 07:00, ndërsa avioni ishte plot me pasagjerë. Pamjet e publikuara në rrjet tregojnë burrin duke bërtitur: “Ndaloje avionin. Gjejeni bombën në avion. Vdekje Amerikës. Vdekje Trump-it”, përpara se të thërriste tre herë frazën “Allahu Akbar”, që në arabisht do të thotë “Zoti është më i madhi”.
Menjëherë pas këtij shpërthimi verbal, një pasagjer heroik nga rreshti 21 e rrëzoi burrin në tokë dhe së bashku me një tjetër udhëtar arritën ta mbajnë të shtrirë në dysheme, duke e neutralizuar situatën përkohësisht. Njëri prej tyre dëgjohet duke thënë: “Ulu, mos lëviz”.
Pasagjerët e tjerë, të tronditur, nisën ta pyesin burrin nëse kishte ndonjë pajisje të dyshimtë me vete dhe kërkuan të dinin nëse ishte nën efektin e alkoolit apo i droguar. Ata kontrolluan xhepat dhe çantën e tij, si dhe i morën portofolin për të verifikuar identitetin.
Në sfond, një prej pasagjereve dëgjohet duke qarë teksa telefonon të afërmit për t’i treguar për situatën dramatike në bord. Kabina e ekuipazhit lajmëroi se avioni do të ulej së shpejti.
Me të mbërritur në Aeroportin e Glasgow, në orën 08:20, oficerët e Police Scotland hipën në avion dhe arrestuan të dyshuarin, i cili në ato momente ishte ende i shtrirë në korridorin e avionit. Një prej policëve dëgjohet duke e pyetur: “Je i qetë tani? Do të rrish i qetë kur të të ngremë në këmbë?”.
Një zëdhënës i kompanisë easyJet deklaroi: “Fluturimi EZY609 nga Luton drejt Glasgow u prit nga policia në mbërritje, ku një pasagjer u largua nga avioni për shkak të sjelljes së tij. Stafi ynë është trajnuar për të reaguar shpejt dhe me profesionalizëm në çdo situatë që cenon sigurinë dhe mirëqenien e pasagjerëve dhe ekuipazhit”.
Policia e Skocisë konfirmoi arrestimin e një 41-vjeçari dhe tha: “Besojmë se incidenti ishte i izoluar dhe se nuk ka persona të tjerë të përfshirë. Videot që po qarkullojnë online janë duke u analizuar nga njësia kundër terrorizmit”.
