Një moment spektakolar dhe njëkohësisht dramatik është regjistruar në qiellin e Dubait, ku një avion luftarak i Emirateve të Bashkuara Arabe rrëzoi një dron iranian pranë një prej zonave më të frekuentuara të qytetit.
Pamjet e publikuara në rrjetet sociale tregojnë një avion luftarak F-16E duke ndjekur një dron iranian të tipit Shahed-136 mbi plazhin Al Mamzar. Në video shihen pushues të shumtë të habitur teksa shikojnë drejt qiellit, ndërsa droni fluturon në lartësi të ulët mbi det.
Pak sekonda më pas, avioni luftarak lëshon një raketë ajër-ajër të tipit AIM-9X Sidewinder, e cila përdoret për përballje në distanca të afërta. Pas goditjes, droni shpërthen dhe shkatërrohet në ajër.
Sipas Ministrisë së Mbrojtjes së Emirateve të Bashkuara Arabe, vetëm të dielën u zbuluan 117 dronë që hynë në hapësirën ajrore të vendit. Nga këta, 113 u interceptuan dhe u shkatërruan nga sistemet e mbrojtjes ajrore, ndërsa katër ranë brenda territorit të vendit.
Autoritetet shtuan gjithashtu se janë neutralizuar edhe 16 raketa iraniane, ndërsa një tjetër ra në det.
Sulmet erdhën si pjesë e një serie goditjesh hakmarrëse nga Irani në Lindjen e Mesme pas vrasjes së udhëheqësit suprem Ayatollah Khamenei. Irani ka sulmuar jo vetëm Emiratet e Bashkuara Arabe, por edhe disa shtete të tjera të Gjirit si Katari, Bahreini dhe Arabia Saudite.
Sipas autoriteteve të Emirateve, që nga fillimi i sulmeve të lidhura me operacionet amerikano-izraelite, Irani ka lëshuar 238 raketa balistike drejt territorit të tyre. Nga këto, 221 janë shkatërruar nga mbrojtja ajrore, ndërsa vetëm dy kanë arritur objektivin.
Ndërkohë, një sulm me dron gjatë fundjavës shkaktoi viktima dhe dëme në Dubai. Një person humbi jetën pasi mbetje nga një dron i rrëzuar ranë mbi automjetin e tij, ndërsa dy ndërtesa banimi u përfshinë nga flakët.
