Një kompani hekurudhore britanike premtoi sot se do të bënte të pamundurën për të ndihmuar një violinist të pakujdesshëm të gjente violinën e tij 310-vjeçare, me një vlerë prej 250 000 stërlinash (289 000 euro), të cilën e kishte harruar në një tren.
Solisti, Stephen Morris harroi të martën në mbrëmje violinën e tij, të prodhuar nga artizani gjerman, David Tecchler në 1709, në një tren që lidh stacionet e Londrës “Victoria” me “Orpington”, në juglindje të Londrës, sipas BBC.
“Ne do të bëjmë gjithçka që është e mundur për të gjetur violinën e çmuar të Stephen dhe kolegët tanë janë angazhuar tashmë për të kuptuar se çfarë i ka ndodhur”, theksoi një zëdhënës i kompanisë “Southeastern” në një komunikatë.
Ai theksoi se kompania po bashkëpunonte me policinë e transporteve për të parë imazhet e kamerave të mbikëqyrjes së trenit dhe ndalesat nga të cilat ka kaluar.
Sipas BBC, Stephen Morris i është dashur të merrte violinën e bashkëshortes së tij, violiniste profesioniste, për të performuar me Orkestrën Filarmonike mbretërore (Royal Philharmonic Orchestra)në kuadër të dy koncerteve të Andrea Boccellit në fundjavë./ATSH/
