Viti 2025 është mbyllur me një rekord alarmant në botën e kriptomonedhave, pasi kriminelët kibernetikë kanë arritur të vjedhin rreth 2.7 miliardë dollarë në asete digjitale, shifra më e lartë e regjistruar ndonjëherë nga sulmet hakerike në këtë sektor. Të dhënat janë konfirmuar nga kompani të specializuara në monitorimin e blockchain-it.
Gjatë vitit, dhjetëra sulme kanë goditur bursa kriptovalutash dhe projekte të financimit të decentralizuar (DeFi), duke ekspozuar dobësi serioze në sigurinë e platformave web3. Sulmi më i madh u regjistrua ndaj bursës Bybit me qendër në Dubai, ku hakerat arritën të përvetësonin rreth 1.4 miliardë dollarë në kripto, duke e bërë këtë ngjarje vjedhjen më të madhe të kriptomonedhave në histori.
Sipas firmave të analizës së blockchain dhe autoriteteve amerikane, përfshirë FBI-në, pas këtij sulmi qëndrojnë hakerë të lidhur me qeverinë e Koresë së Veriut, të cilët prej vitesh konsiderohen si grupi më aktiv dhe më i suksesshëm në sulmet ndaj industrisë së kriptove. Ky operacion e tejkaloi ndjeshëm rekordet e mëparshme, përfshirë vjedhjet e vitit 2022 ndaj rrjeteve Ronin dhe Poly, që kapën shifrat 624 dhe 611 milionë dollarë.
Vlerësime të ngjashme janë publikuar nga kompani si Chainalysis, TRM Labs dhe De.Fi, të cilat konfirmojnë se totali i kriptove të vjedhura gjatë vitit 2025 arrin në 2.7 miliardë dollarë, pa përfshirë qindra mijëra dollarë të tjerë të humbur nga portofole individuale.
Raportet tregojnë se Koreja e Veriut ka qenë përgjegjëse për më shumë se 2 miliardë dollarë nga këto vjedhje vetëm këtë vit, ndërsa që nga viti 2017, hakerët e lidhur me Phenianin dyshohet se kanë grabitur rreth 6 miliardë dollarë në kripto, të përdorura për financimin e programit bërthamor të vendit.
Tendenca e sulmeve nuk duket se po ngadalësohet. Pas 2.2 miliardë dollarëve të vjedhura në vitin 2024 dhe 2 miliardëve në vitin 2023, shifrat e vitit 2025 tregojnë se krimi kibernetik mbetet një nga kërcënimet më serioze për industrinë globale të kriptomonedhave.
